Pas protestës para Kuvendit, demokratët janë shpërngulur në rrugën “Mustafa Metohiti” për të protestuar si çdo mbrëmje poshtë banesës së kreut të PD-së, Sali Berisha, i cili ndodhet nën masën “arrest shtëpie”. Për herë të parë, në atë protestë kanë shkuar dhe deputetët e grupit të Gazment Bardhit.
Gjatë fjalimit të tij, Berisha njoftoi dhe datën e protestës së radhës, e cila do të jetë më 20 Shkurt, një ditë historike për demokracinë në Shqipëri, pasi është dita e rrëzimit të bustit të diktatorit komunist Enver Hoxha.
Lideri demokrat u bëri thirrje shqiptarëve që më 20 shkurt të vijnë në Tiranë, “në ditën anti-tirani, në ditën anti-Edvin, në ditën kundër krimit, kundër dhunimit të votës, për dinjitetin e Shqipërisë, për dinjitetin e shqiptarëve”, siç theksoi ai.
Berisha tha se nuk ka forcë në botë që do mbrojë këto simbole të krimit, të poshtërimit të shqiptarëve para njerëzve idealistë, njerëzve atdhetarë, njerëzve demokratë.
Berisha: Miqtë e mi kjo është betejë e triumfit, betejë e triumfit të luftëtarëve të lirisë, betejë e atyre që e duan Shqipërinë në Europë, betejë e triumfit të ëndrrave të të rinjve shqiptarë. Të dashur miq, ka vetëm një rrugë drejt fitores, betejë pa kthim, mosbindje civile. Me 20 shkurt, Shqipëria në Tiranë në ditën anti-tirani, në ditën anti-Edvin, në ditën kundër krimit, kundër dhunimit të votës, për dinjitetin e Shqipërisë, për dinjitetin e shqiptarëve. 20 shkurti është dita e triumfit tonë, është dita e dridhjes në themele të pushtetit të krimit, të pushtetit të drogës, të monizmit të Edi Ramës. Demokrate e demokratë, simbolet e krimit, simbolet e monizmit, simbolet e poshtërimit të shqiptarëve janë parlamentit Rama-Linda, kryeministria e Edvin Kristaq Xhelatit, SKAP-i i Altin Dumanit, Surreli i Edvin Kristaq Xhelatit. Nuk ka forcë në botë që do mbrojë këto simbole të krimit, të poshtërimit të shqiptarëve para jush, njerëzve idealistë, njerëzve atdhetarë, njerëzve demokratë. Para luanit të zgjuar të shqiptarëve, ndaj dhe beteja e luanit do të jetë shembja e këtyre ngrehinave të krimit.
Miqtë e mi, një nderim të pakufishëm për ju, e nisët këtu me disa dhjetëra vetë. Ja ku jeni sot, dhjetëra mijëra dhe së shpejti do jemi qindra mijëra. Tirana, Shqipëria do jetë e juaja! Në këmbë demokrate e demokratë, opozitare e opozitarë për dinjitetin tonë, për të ardhmen tonë, për Shqipërinë, për lirinë tonë, për Shqipërinë në Europë. Rrofshi ju, rroftë opozita e bashkuar! Nderim deputetëve qëndrestarë, nderim protestuesve qëndrestarë. Fitore, fitore, fitore! Edhe njëherë, urime për fitoren e shkëlqyer. Luani u zgjua, mjerë hienat çfarë do të shohin nga luani.
Rrofshi ju, rroftë Shqipëria!
