Dy aksidente me pasojë vdekjen janë regjistruar pasditen e kësaj të diele në vend.
Aksidenti i parë u regjistrua rreth orës 17:20, në aksin rrugor “Bilisht-Korçë” në afërsi të fshatit Belorta. Një automjet tip “Hyundai” me drejtues shtetasin K. H., 23 vjeç, është përplasur me automjetin tip “Volkswagen” me drejtues shtetasin Elvis Mizaku, rreth 36 vjeç, banues në fshatin Terovë.
Si pasojë e përplasjes ka humbur jetën Elvis Mizaku, dhe janë plagosur 4 pasagjerë të automjetit tjetër tip “Hyundai”, shtetaset me iniciale B. P., D. P., Dh. P. dhe shtetasi A. P., të cilët ndodhen në spitalin e Korçës, nën kujdesin e mjekëve.
Paraprakisht dyshohet se shkak për aksidentin të ketë qënë shpejtësia tej normave të lejuara. Sakaq policia bën me dije se me drejtuesin e automjetit tip “Hyundai” shtetasin K. H., po kryhen veprimet e mëtejshme procedurale.
Njoftimi i policisë:
Për pasojë, ka humbur jetën drejtuesi i automjetit tip “Volkswagen”, 36-vjeçari E. M., dhe janë dëmtuar 4 pasagjerë të automjetit tjetër tip “Hyundai”, shtetaset B. P., D. P., Dh. P. dhe shtetasi A. P., të cilët ndodhen në spitalin e Korçës, nën kujdesin e mjekëve.
Me drejtuesin e automjetit tip “Hyundai” shtetasin K. H., po kryhen veprimet e mëtejshme procedurale.
Grupi hetimor po punon për përcaktimin e shkaqeve të aksidentit.
Sakaq aksidenti i dytë ka ndodhur rreth orës 20:30, në aksin Librazhd-Qafë Thanë, në vendin e quajtur “Mbikalimi i Trenit” në Dragostunje.
Një automjet tip “Benz” ka dalë nga rruga, e si pasojë ka humbur jetën pasagjeri në mjet Dorian Belba, , 18 vjeç, dhe janë plagosur drejtuesi i mjetit Meglin Zeneli, 21 vjeç, Gerald Verçani 19 vjeç, pasagjer dhe Janikos Shyti 20 vjeç, pasagjer.
Shkak për aksidentin dyshohet të ketë qënë shpejtësia tej normave të lejuara. Drejtuesi i mjetit dhe dy pasagjerët e plagosur u transportuan për ndihmë mjekësore në spital dhe mësohet se janë jashtë rrezikut për jetën.
Njoftimi i policisë:
Në aksin rrugor “Librazhd-Perrenjas”, automjeti që drejtohej nga shtetasi M. Z., 21 vjeç, ka dalë nga rruga. Për pasojë ka humbur jetën në vendngjarje pasagjeri që udhëtonte në këtë automjet shtetasi D. B., 18 vjeç, si edhe kanë mbetur të dëmtuar drejtuesi i automjetit dhe 2 pasagjerë të tjerë, të cilët janë transportuar për ndihmë mjekësore në spital për momentin jashtë rrezikut për jetën.
Grupi hetimor në vendngjarje po punon për zbardhjen e plotë të shkakut të aksidentit.
