Rusia ka testuar me sukses një raketë të re me kapacitet bërthamor, e pajisur me motor bërthamor, e quajtur Burevestnik.
Kështu ka njoftuar shefi i Shtabit të Përgjithshëm të Ushtrisë ruse, gjenerali Valery Gerasimov, në një raport drejtuar presidentit Vladimir Putin, raporton Reuters.
Sipas Gerasimovit, raketa ka përshkuar 14 000 kilometra dhe ka qëndruar në ajër për rreth 15 orë pa ndërprerje, një arritje që Moska e cilëson si “historike” për aftësitë strategjike të saj.
Putin, i veshur me uniformë ushtarake në pamjet e publikuara të dielën, 26 tetor, deklaroi se testet thelbësore të Burevestnik tashmë kanë përfunduar, ndërsa urdhëroi që të nisë faza përfundimtare para vendosjes operative të raketës.
Kreu i Kremlinit e ka quajtur më herët këtë armë si një sistem “të pathyeshëm” për mbrojtjet aktuale dhe të ardhshme raketore, falë rrezes pothuajse të pakufizuar dhe trajektores së paparashikueshme të fluturimit.
Raketa, e njohur në NATO me emrin SSC-X-9 Skyfall, është pjesë e arsenalit të armëve “të gjeneratës së re” që Rusia pretendon se e vendosin atë përpara çdo fuqie tjetër bërthamore.
Me këtë test, Moska sinjalizon një tjetër përshkallëzim në garën globale të armëve strategjike, ndërkohë që tensionet me Perëndimin mbeten të larta për shkak të luftës në Ukrainë.
