Kryetari i PD-së Sali Berisha akuzoi kreun e SPAK, Altin Dumanin se po përpiqet që të mbyllë aferën Rama-McGonigal.
Askush të mos mendojë se Dumani do të hetojë, tha Berisha. Sipas tij, Dumani është bashkautor me mbrojtjen që i bën në të gjitha krimet Edi Ramës.
“Para dy javësh deklaroi se po heton skandalin McGonigal, e vërteta është se po bën gjithçka të mbyllë superskandalin e shekullit”, theksoi Berisha gjatë fjalës së mbajtur në protestën e zhvilluar këtë të shtunë poshtë banesës së tij.
“Asnjë nga ata që kanë denoncuar publikisht gjobëvënësit Edi Rama-McGonigal-Duçka e Neza e kompani, nuk janë thirrur për t’u pyetur. Skapi nuk do dëshmitarë kundër Edi Ramës. Skapi nuk do dëshmitarë kundër Erion Veliajt. Arben Ahmetaj u deklaroi shqiptarëve se ndërsa merrej me laminatet dhe pllakat në banjon dhe kuzhinën e tij, nuk merrej me zhdukjen e 60 milionë eurove në Dubai, para të paguara nga taksapaguesit për ndërtimin e djegësit të Tiranës. A ka dëgjuar ndonjë prej jush se çfarë u bë me 30 milionë euro që u faturuan në sipërmarrje të të moshuarve në azil të pleqve? Çfarë u bë me to? Dumani i partisë merret me pllakat dhe laminatet, por nuk merret me 130 milionë euro të zhdukura për ndërtimin e djegësit të Tiranës, për të cilin nuk ekziston asnjë gjurmë. Të gjitha këto pra dëshmojnë rëndësinë jetike të protestës suaj”, tha kryedmeokrati.
Më herët, opozita ka denoncuar se Rama e McGonigal kishin ngritur një skemë gjobëvënie pre e së cilëve ishin biznesmenë, të cilëve u janë marrë shuma të konsiderueshme monetare duke u premtuar ndërhyrje për mosvendosje sanksionesh nga Shtetet e Bashkuara.
Sipas Berishës, Rama dhe ish agjenti i FBI-së i dënuar në SHBA, McGonigal kanë arritur të zhvatin 50 mln euro.
