Gazetarja Ola Xama, duke folur në MCN TV, listoi 10 pika që sipas saj tregojnë implikimin kryebashkiakut Erion Veliaj në aferën e inceneratorit të Tiranës.
Një prej pikave është sjellja e Veliajt si pronari faktik i inceneratorit të Tiranës, ku kryebashkiaku dërgon emaile që të përjashtohet nga tarifa e depozitimit të dherave kompania që po ndërton kullën “Eye of Tirana” dhe merret me mbetjet pas shembjes së Teatrit Kombëtar.
Po ashtu, disa prej pikave ishin dhe zotimet e Veliaj për këtë incenerator, ku mori përsipër financimi për të gjitha bashkitë e qarkut të Tiranës kur ai nuk e ka kompetencë
“Meqenëse pyete se cilat janë implikimet e Veliajt, kam shkurt 10 pika. Veliaj publikisht thotë Tirana është më e pastër dhe mbron publikisht inceneratorin e Tiranës, njësoj siç e ka mbrojtur edhe Ahmetaj para ca kohëve, kur në fakt atje nuk ka incenerator, dhe Tirana nuk është më e pastër, Tirana po shkon sërish sot në emergjencë mjedisore dhe janë paguar 73 milionë euro vetëm për inceneratorin e Tiranës, para publike, pa llogaritur ato që kanë paguar ndërtuesit dhe bashkia s’ka marrë asnjë masë qoftë për ta penalizuar kontaktorin. Nga dokumentet që kanë dalë në media dhe denoncimet e partive politike që kanë qenë aktive te çështja e inceneratorëve, thonë shkresat ku Ministria e Infrastrukturës dhe Energjisë i ka dërguar Bashkisë së Tiranës, që të lutem sill përfaqësuesit e Bashkisë së Tiranës te njësia e monitorimit të projektit, kjo njësi është përgjegjëse se si ecën kontrata, bëhet inceneratori ose jo dhe Bashkia e Tiranës ka mosvepruar duke mos i dërguar. Pjesa tjetër, pse u ra dakord për incenerim kur nevoja për incenerim nuk është fare. Pse përgjegjës janë Taulant Tushe me Namik Simixhiun?! Kanë shprehur vullnetin e tyre ata në komision apo vullnetin e Bashkisë së Tiranës që ka vendimmarrjen te koka lartë. Pse u mor përsipër financimi nga Veliaj, ku s’i kishte paratë?! Pse u mor përsipër financimi për të gjitha bashkitë e qarkut të Tiranës kur ai nuk e ka kompetencën? Pse u anashkalua miratimi i fondeve nga Këshilli Bashkiak? Po ashtu në dosje del që kompania ligjore e cila këshillonte Klodian Zoton për marrjen e kontratës së inceneratorit të Tiranës ishte kompania ‘Tashko Pustina’, ku punon, në mos punonte, bashkëshortja e Veliajt. Janë gjetur edhe email-e se si Taulant Tushe ndihmon Klodian Zoton dhe bisedon me të mbi skemën e financimit. Këto emaile nuk i shohim te vendimi i masës së sigurisë, e cila mund të ishte një provë rënduese para gjykatës për z.Tushe. Ajo që tha një ditë më parë ish-zv.kryeministri, sjellja e Erion Veliajt si pronar faktik i inceneratorit të Tiranës, ku dërgon emaile që të përjashtohet nga tarifa e depozitimit të dherave kompania që po ndërton kullën “Eye of Tirana” dhe mbetjet pas shembjes së Teatrit Kombëtar. Këto ishin ato 10 pikat që unë kam nxjerrë për implikimin.
SPAK-u më shumë se hetim të procedurës duhet të ndjekë paranë, jo te pllakat, te milionat e eurove. Te këta të kompanive fiktive kush ka firmosur që të derdhet Cash-i, merr atë administratorin, nuk e pashë këtë pyetje te dosja. Kjo nuk është mbrojtje, është kod mafioz, që o të gjithë bashkë, ose nuk bëhem kokë turku”, deklaroi gazetarja Ola Xama, duke iu referuar në fund, deklaratës së djeshme të Arben Ahmetajt.
