Ish-numri dy i qeverisë, Arben Ahmetaj deklaroi në intervistën e transmetuar mbrëmjen e së enjtes se ka frikë për jetën e tij dhe familjen pas akuzave publike ndaj kryeministrit Edi Rama.
Në deklaratat e Ahmetajt, u ndal këtë të premte kryedemokrati Sali Berisha gjatë fjalës së mbajtur në protestën poshtë banesës së tij.
Kryedemokrati tha se rrëfimi i Ahmetajt për kërcënimet e Ramës ishte një moment tronditës që e emocionoi.
“Por të jem i sinqertë pati një aspekt në të cilin nuk është se, nuk u emocionova. Pati një aspekt tronditës në rrëfimin dhe intervistën e tij. Cili ishte ky aspekt? Kërcënimi me jetë i tij në kryesinë e partisë nga qelitë e burgjeve, duke dëshmuar se gjithçka zhvillohej si në shpellat, si në bodrumet e mafias. Këtu unë i jap të drejtë, sado që në rrëfimin e tij tronditës përpiqej herë të thoshte se, frika është normale, dhe sigurisht normale është, dhe herë tjetër se unë nuk kam frikë, por e vërteta është se ai është kërcënuar me jetë dhe kërcënuesi i tij ka një emër, dhe siç e tha dhe ai vetë, është Edi Rama”, u shpreh.
Berisha e paralajmëroi Ramën se “një qime floku po e prekët Arben Ahmetajt dhe familjes së tij, do ta pësosh me familjen tënde”.
“Ja bëj këtë sepse Arben Ahmetaj, të denoncojë. E bëre me Ervis Martinajn, por se bën dot kurrë për Arben Ahmetaj. Mos përdor kriminel mor hajdut, përdor vrasës, mor frikacak, sepse nuk do të mund të ndalosh veprime të tjera pastaj”, u shpreh Berisha.