Kreu i PD-së, Sali Berisha u ndal te intervista e Arben Ahmetajt, gjatë fjalës së mbajtur këtë të premte në protestën e zhvilluar poshtë banesës së tij.
Berisha deklaroi se ato që tha Ahmetaj janë denoncuar prej kohësh nga Partia Demokratike dhe janë të ditura nga demokratët. Për të, mesazhi i Ahmetajt, ishte kryesisht tronditës për skeptikët socialistë ndaj akuzave të opozitës.
“Në intervistë mbrëmë, ish-zëvendësi i Edi Ramës tronditi anekënd Partinë Socialiste. Tronditi thellë ata socialistë të cilët për bindjet e tyre e kanë patur të vështirë të besojnë denoncimet e PD-së, të besojnë denoncimet e Sali Berishës se kreu i vjedhjes së shekullit është Edi Rama. Se pronar i djegësit të Tiranës është Erion Veliaj dhe Edi Rama. Se mbrojtës të vjedhjes së shekullit janë Dumanër e kompani”, theksoi kryedemokrati.
“Por, mbrëmë patën rastin të dëgjojnë nga goja e një socialisti i cili ç’është e vërteta ka qenë objekt sulmesh t merituara dhe të pandërprera nga Sali Berisha në të gjithë karrierën e tij politike, Arben Ahmetaj. Por Arben Ahmetaj mbrëmë nuk u tha të vërtetën ju, as demokratëve se ju e keni dëgjuar atë dhe besuar me dhjetëra e dhjetëra herë. Ju tha të vërtetën socialistëve të cilët ju drejtua se afera e djegësave është një aferë llahtarish, është një aferë e mafies më të rrezikshme të Shqipërisë, se ka për kokë Edi Ramën dhe falangat e tjera të krimit pas tij”, tha Berisha.
Kreu i PD kujtoi se gjatë verës, në mënyrën më të përsëritur por edhe në këto kohë në mënyrë të përditshme, PD-ja ju ka deklaruar shqiptarëve se afera e djegësave është vjedhja e shekullit. “Se kjo vjedhje e shekullit, shtoi, kurrë nuk mund të ndodhte pa angazhimin direkt, personal, pa firmat fap, fap, fap, e paf, paf, paf, të kryehajdutit të kombit, Edi Rama”.
“Sepse është Edi Rama që në 2014 përmbysi strategjinë e trajtimit të mbetjeve me landfille të hartuar me paratë e BE-së dhe e zëvendësoi në mënyrë të kundraligjshme me strategjinë e djegësave. Është personalisht Edi Rama përgjegjës direkt, që imponoi me Agaçin me Metanin kalimin nga strategjia e landfill në strategjinë e djegësave. Është personalisht Edi Rama dhe askush tjetër nuk mundej që të përfshinte në buxhetin afatmesëm, buxhetimin me 200 mln euro të tre djegësave që mjaftonin për të djegur mbeturinat e gjithë Ballkanit. Është Edi Rama me Agaçin dhe Metanin ata të cilët mblodhën brenda 24 orësh, 17 firma të të gjitha ministrive që nuk ka ndodhur kurrë në historinë e shtetit shqiptar.
Është Edi Rama me Agaçin dhe Metanin e tij të cilët firmosën për procedurën me negociata të mbyllura, ndërkohë që ajo ishte në kundërshtim flagrant me çdo ligj të vendit. Gjithçka ne e paraqitëm para jush. Paraqitëm çdo dokument. Komisioni Hetimor parlament nxorri në dritë të gjitha. Por Edi Rama për të larë duart si pilati zgjodhi politikën e kokave të turkut. Pas arrestimit të Lefterit, i cili ishte një hajdut me qira, e merrnin me qira sa herë u duhej për të vjedhur. Edi Rama zgjodhi për kurban Arben Ahmetaj”, tha Berisha.
