Nga Boldnews.al
Vetëm pak orë pasi ish-ministri i shëndetësisë Ilir Beqja kishte bërë adetin e paraqitjes në SPAK, si i dyshuar për korrupsion dhe shpërdorim detyre, për aferën e sterilizimit të mjeteve kirurgjikale, kreu i qeverisë Edi Rama dha një “premtim të madh” për të reja në sistemin shëndetësor. Do të sjellë mjekë robotë për të kryer operacione…
“Tani po punojmë me ministren për të sjellë robotë për operacionet. Kemi të gjitha arsyet të ndjehemi të inkurajuar dhe optimistë. Kemi shumë arsye konkretë për të besuar se Shqipëria e vitit 2030 do të jetë një vend me një shërbim shëndetësor që do t’u krijojë të gjitha shqiptarëve kushtet psikologjike”-tha Rama tre ditë më parë.
Një deklaratë e tillë në “perves-politikë” shkon si thikë në shpinën e çdo mjeku të ri apo studenti të mjekësisë. Shumë prej tyre, krahas orëve në punë kryejnë njëkohësisht kurse të gjermanishtes, si kandidatët e ardhshëm për t’iu bashkuar minjëra kolegëve që e kanë lënë këtë vend jo nga infrastruktura, por mungesa e shpresës.
Janë mjekë, por sado të zotë të jenë në profesionin e tyre nuk e shërojnë dot “sëmundjen e Rilindjes”, e cila quhet korrupsion, propagandë dhe “pandemi konçesionare”. Aktualisht, Shqipëria ka 16.47 mjekë për 10 mijë banorë, e cila është shifër të paktën dy herë më pak se mesatarja e Europës prej 47.6 mjekësh për 10 mijë banorë.
Po ashtu ky fenomen dhe problem i madh është edhe në infermieri. Kërkesat më të mëdha të studentëve për vitin akademik 2023-2024 ishin kryesisht për studime në infermieri. Mbi 90% e tyre të pyetur se përse kanë zgjedhur këtë degë shprehen se e shohin si mundësi vetëm për tu larguar jashtë vendit.
Politikat qeverisëse po largojnë mjekët e “gjallë” ndërsa në propagandë flitet për robotë që do i zëvendësojnë. Kjo është më shumë se një arsye për të vënë alarmin se po ikin të rinjtë e shkolluar, duke e lënë Shqipërinë e plakur edhe pa mjekë dhe infermierë. Nuk është më vetëm çështje page, por dinjiteti dhe mundësish të vrara nga mënyra qeverisëse dhe mbi të gjitha nga fyerja që u bëhet.
Si një vend çmendurish, nuk është çudi që të sajohet ndonjë robot si mjek që do thuhet se “bën mrekullinë” dhe se falë Ramës ia arritëm kësaj dite. Po as çudi fare nuk do jetë që telekomandën ta mbajë vetë kryeministri në duar dhe të pendohet se përse e hoqi “zorrën qorre” një vit më parë dhe jo tani që i erdhi roboti kirurg…
Nëse vjen, ky robot do të kryejë operacion me sitet kirurgjikale të konçesionit të Ilir Beqjas. Po ashtu “analizat e pacientit” do të dalin nga konçesioni i laboratorëve, një tjetër aferë që pritet të shpërthejë. Po sikur roboti të mësojë hiletë e elitës drejtuese dhe të kërkojë të jetë “kryetar i tenderave konçesionare” në Ministrinë e Shendetësisë? Këtu do të jetë edhe “risia” më e madhe që “roboti kirurg” mund të merret “i pandehur” nga SPAK nën akuzën e korrupsionit. Kjo mund të vlejë në një të ardhshme ndoshta shumë të largët, pasi për aq kohë sa ka “prokurorë robotë” që hapin e mbyllin dosjet të telekomanduara nga qeveria, rreziku nuk ekziston!
