Profesori Besnik Baraj, anëtar i Akademisë së Shkencave, ka prezantuar në emisionin “Të Paekspozuarit”, disa matje të ndotjes së ajrit në Tiranë nga grimcat që qëndrojnë pezull në ajër, të cilat depërtojnë në enët tona të gjakut dhe konsiderohen nga OBSH si më të rrezikshmet. Këto grimca shkaktojnë sëmundje të rënda si hemoragjitë cerebrale, kanceri, infarktet, etj.
Matjet në mjediset e lokaleve pranë rrugëve kryesore të Tiranës, tregojnë prezencën e grimcave nga 33.6 në 92.6 mikrogram/m3, shumë herë më e lartë se vlera e rekomanduar nga OBSH, 5 mikrogram/m3. Në qendrat tregtare në vendet e parkimit vlerat arrijnë në nivele kritike, deri në 352 mikrogram/m3, nga norma 5 mikrogram/m3.
“Këto matje i kam kryer nga ora 08:00 e mëngjesit deri në 10:00 të mëngjesit, në objektet ku njerëzit ulen buzë lokaleve. Ishte ditë e thatë. Vlerat janë shumë të mëdha. Janë shumëfish nga rekomandimi i OBSH”, tha Baraj në Të Paekspozuarit.
Profesori Baraj, i ka bërë matjet edhe në orët e para të mëngjesit, ku ka qarkullim minimal të mjeteve dhe grimcat janë sërish në nivele alarmante. Vlerat e matura në 15 stacione të Tiranës, nga ora 03:00-05:00, variojnë nga 31.7 – 78 mikrogram/m3. Pra në asnjë rast më e vogël se 5 mikrogram/m3, që është norma e OBSH.
Për të bërë një krahasim me disa metropole shumë më të zhvilluara se Tirana. Ditën e sotme në Londër niveli i PM 2.5 ka qenë 13 mikrogram/m3. Në New York ka qenë 4.2 mikrogram/m3. Në Romë ka qenë 12.7 mikrogam/m3. Në Paris ka qenë 16 mikrogram/m3 dhe në Berlin ka qenë 11.1 mikrogram/m3. Ndërsa matjet e Tiranës që ka kryer zoti Baraj, tregojnë shifra shumë më të larta, nga 33-92 mikrogram/m3.
Baraj i ka kryer matjet me një aparat i cili e ka marzhin e gabimit deri në +/- 10%. Edhe po t’ua heqësh vlerave këtë përqindje, shifrat e ndotjes në Tiranë nga grimcat vdekjeprurëve, janë në nivele shumë shqetësuese, ndërkohë kryebashkiaku i Tiranës u ka rekomanduar qytetarëve, që nuk u pëleqejnë ndërtimet dhe ndotja, që “të shpërngulen në fshat”.
Arlind Qori: Shkaktarët e ndotjes nuk jetojnë në Tiranë
Pedagogu dhe drejtuesi i “Lëvizja Bashkë”, Arlind Qori, duke diskutuar shifrat për ndotjen e lartë të ajrit në qytetin e Tiranës të prezantuara nga ish-deputeti Besnik Baraj, deklaroi në emisionin “Të Paekspozuarit” se kryeministrit dhe kryebashkiakut nuk i intereson ndotja, por përfitimi nga lejet e ndërtimit. Qori tha se shkaktarët e këtij procesi nuk jetojnë në zonat e ndotura, nisur nga z. Rama që jeton në një fshat jashtë Tiranës dhe është i siguruar për vete.
“Nëse në Tiranë norma e fitimit në ndërtim është disafish, sigurisht që ndërtuesit janë të interesuar që ta bëjnë këtë gjë. Nëse ti si kryetar bashkie apo kryeministrin merr 20 përqindëshin e lejeve të ndërtimit, financime për fushatë elektorale, akses në media, ty si kryebashkiak dhe kryeministër të interesojnë lejet e ndërtimit, jo ndotja. Nëse ti je grosisti i karburanteve dhe qyteti i formuar kështu ka një konsum, shumë media financohen nga paratë e atij sistemi, ka parti politike që mbahen nga një sistem i tillë. Shkaktarët e këtij procesi nuk jetojnë në zonat e ndotura. Z. Rama jeton në një fshat jashtë Tiranës, është i siguruar për vete dhe mund të vijë në studion tënde dhe të thotë se nuk ka ndotje Tirana“, u shpreh.
Besnik Baraj: Nuk ka politikan që nuk rri 10 orë në Tiranë, prandaj duhet të mendojnë.
Arlind Qori: Politikanët tanë kanë mjaft para dhe mund të kurohen në klinikat më të mira të botës, ndërsa ne përplasemi në spitalet publike të Shqipërisë dhe mund të bjerë edhe suvaja.
