Gjykata e Tiranës ka caktuar masën e sigurisë “arrest me burg” me afat 20 ditor për ekonomistin 35-vjeçar Jetnor Zhaboli, i cili mbante të mbyllur prej muajsh nënën, gruan dhe dy fëmijën e mitur, brenda banesës së tyre, duke i monitoruar dhe me kamera 24 orë.
Prokurorja e çështjes Eliona Elezi fillimisht kërkoi “arrest me burg” pa afat, por më pas ndryshoi qëndrim, duke kërkuar burg për 30 ditë deri sa të dalë ekspertiza psiko-ligjore. Gjatë seancës së sotme, avokati i 35-vjeçarit, Edison Hasanbashaj, ka kërkuar shtrimin në psikiatri të Zhabolit deri sa të dalë rezultati i ekspertizës.
Vetë Jetnor Zhaboli foli shkurtimisht në gjykatë ku tha se e bëri një veprim të tillë “për tu kujdesur për anëtarët e familjes pasi kisha frikë për ta”.
Nga verifikimet e kryera nga ana e Policisë ka rezultuar se 35-vjeçari, sa herë largohej nga banesa, në zonën e Selitës së vjetër pranë Xhamisë, i mbyllte familjarët brenda, i monitoronte me kamera dhe ju bllokonte valët e telefonit duke mos i lejuar të komunikojnë me asnjë person. Ngjarja është zbuluar më datë 25 Janar të këtij viti, teksa ekonomisti dyshohet se ushtronte dhe dhunë ndaj bashkëshortes së tij, pasi në pjesë e shpatullës së saj është konstatuar një shenjë e madhe e mavijosur.
Prokuroria e Tiranës, veç akuzave të “Heqjes së lirisë” dhe “Dhunë në familje”, ka ngritur dhe akuzën tjetër për “Shkaktim të vetëvrasjes i mbetur në tentativë” ndaj Jetnor Zhabolit, pasi bashkëshortja e tij ka tentuar t’i japë fund jetës dhe sipas autoriteteve kjo gjë vërtetohet përmes një dokumenti. Më konkretisht përmes një letre të gjetur në një valixhe me kod në dhomën e gjumit të çiftit ku bashkëshortja shkruan fjalë lamtumire për familjarët.
“Më fal **** dhe **** s’mund të shkruaj shumë. Babi, nëna, gjyshi, halla, daja do t’ju flasin shumë për mamin. Do ju dua shumë edhe pse po ju lë. Bedri, Gela, Baci më falni por kurrë mos ndjeni turp për mua, s’ju turpërova kurrë. Mami, babai, Tina faleminderit për gjithçka. Nori të dua shumë. Ky ishte gabimi im. Ju dua shumë nëse më doni dhe ju amanet fëmijët dhe duheni shumë njëri-tjetrin të gjithë. Asnji nuk ka faj për fundin tim, nuk e përballoj dot këtë stres”, shkruhej në letrën e gruas së 35-vjeçarit.
Jetnor Zhaboli dhe bashkëshortja e tij kanë 15 vite të martuar dhe janë prindër të dy fëmijëve të mitur, një djali 3 vjeçar dhe një vajze 9 vjeçare. Në fillimet e veta çifti ka pasur harmoni të plotë, ku janë njohur në fakultetin ekonomik, të cilët kanë qenë studentë ekselentë.
Nëna e Jetnorit ka treguar para oficerit të Policisë Gjyqësore se nusja e djalit është një vajzë e rregullt, besnike dhe e ndershme dhe nuk ka asnjë ankesë për të. Ajo tregon i biri ka filluar të ketë probleme prej 1 viti, duke pretenduar se dëgjon zhurma.
“Prej 1 viti e pak Jetnori ka filluar me probleme shqetesuese emocionele, dhe mendore mund ta themi, ka shqetesime sikur dëgjon zhurma ne mure te baneses, pergjime. Per këte shkak kane bere kontrolle dhe me specialiste dhe nga kontrolli nuk ka dal ndonje gje. Jetnori ka probleme te karakteri emocional te cilat mund te shkojne dhe mendore, e pranon me keqardhe si nëne se e ka djalin e ka pike te dobët.
Jetnori ka probleme pasi nuk ka zhurma ne banese dhe kur e ka kontrolluar ajo se bashku me bashkëshortin nuk ka pasur zhurma, jane sajesa te tijat, ja thote mëndja. Jetnori ka ankes ndaj bashkeshortes ështe xheloz per *****, i ka marr dhe telefonin, ***** nuk ka telefon. ***** eshte grua shembullore por Jetnorit ja ben semundja qe ka”, thuhet në procesverbalin e mbajtur në Polici.
Ndërkohë, bashkëshortja e 35-vjeçarit ka deklaruar në prani të psikologes se prej një viti e gjysmë jetojnë si në burg dhe se bashkëshorti e merr çelësin sa herë që del nga shtëpia në mëngjes dhe ajo nuk ka asnjë komunikim me botën e jashtme.
“[…] ka deklaruar se, ka prej nje vite e gjysmë qe jeton si ne burg, dhunohet dhe nuk ka kallezuar per shkak se e do burrin e saj Jetnor Zhaboli. Ka nje vite e giysem qe jeton ne banese me kamera, pa drite, nuk del vetem, nuk ka telefon dhe e mban te izoluar ne banese.
Gjate githe kesaj kohe nuk di gje per familjen e saj pasi ja ka nderprerë komunikimet. E ka dhunuar shpesh herë por nuk ka kallezuar këte fakt pasi e do burrin e saj. E ka goditur para dy ditësh tek shtëpia e vjehrrit me shkelmë ne shpatull pasi e akuzon se ajo flet me muret. Nuk ka asnje dokument identifikimi pasi bashkeshorti ja ka marr. Ka prej nje vite e giysem që perjeton kete situatë dhe nuk mundet me.
Ka kamera te levizshme ne banese, ka bllokues valesh, alarme, ka kamera te levizshme dhe ja vendos tek komodina e dhomes kur fle gjume eshte e monitoruar, e kontrolluar do moment. Shton se banesa ne korridor ka kamera te vendosur ne korridor, kurse pjesa tjeter eshte me kamera te levizshme. Ka blerë dhe aparat qe gjurmon valet. Gjate konflikteve dhe dhunes se ushtruar ndaj saj kane qënë prezente femijet e tyre”, thuhet në procesverbal.
Nga hetimet ka rezultuar se dhuna fizike e Jetnor Zhabolit ndaj bashkëshortes ishte e përsëritur dhe pa arsye, ku rasti më i fundit ishte dy ditë para arrestit duke e goditur gruan fort në krahë, aq sa shenjat janë të dukshme në trupin e saj.
Veprimet e Jetnorit arrinin në ekstremitet, duke terrorizuar familjen me sjellje të pakontrolluara. Netët ktheheshin në horror, pasi ai fikte energjinë elektrike dhe i zgjonte nga gjumi me drejtimin e elektrikut të dorës në fytyrat e tyre.
Ky tmerr për familjarët ka marrë fund pas arrestimit të ekonomistit, i cili dyshohet se vuan nga probleme të shëndetit mendor, ndërkohë që rasti po ndiqet dhe nga shërbimet sociale.
