Një sherr që ka degraduar në përplasje fizike ka ndodhur mesditën e kësaj të mërkure në fshatin Ungrej të Lezhës. Dy bashkëfshatarë janë konfliktuar me njëri-tjetrin për arsye pronësie.
Shtetasi i përfshirë në konflikt, Ndrec Kola, me fasho në fytyrë tregon se si ndodhi ngjarja. Ai rrëfen se sherret me bashkëfshatarin kanë qënë të vjetra por sot sherri ka agravuar në përdorimin e lopatave dhe mjeteve të rënda.
“Me bashkëfshatarin kemi disa vite që kemi hatërmbetje. Më hyri në tokë të babait, tek vëllai. Futi dhitë në vendin e babit, i kërkova t’i largonte por më tha që ishte toka e vëllait jo e imja. Kapi lopatën dhe më goditi. U përleshëm tek për tek. Mori djalin e vet në telefon dhe më dolën para të dy. Djali më shau. Unë e kapa prej fyti dhe ai ma futi me lopatë dhe me preu gishtin. Ka ardhur policia pasi kam bërë denoncim. Në urgjencë nuk më shërben askush. Dua të mjekohem dhe të marr një dokument që jam dëmtuar. Shteti të marrë masa, Ose unë ose ata. Nëse shteti nuk merret me ta do merrem unë”, tha ai.
