Kryetari i PBDNJ-së, Vangjel Dule është qëlluar sot me vezë teksa po i drejtohej godinës së Gjykatës së Posaçme (GJKKO), ku do të zhvillohej procesi ndaj kryebashkiakut të zgjedhur të Himarës, Fredi Belerit.
Në një intervistë televizive, Dule ka deklaruar se nuk i kishte parë ndonjëherë autorët, teksa ka akuzuar direkt kryeministrin Rama për nxitje të veprimeve të tilla.
Gazetarja: Kush ju qëlloi me vezë, i njihnit dy personat?
Vangjel Dule: Ishte një situatë e papëlqyeshme, e papritur, e paprovokuar. As i kisha parë ndonjëherë këta persona dhe as emrat s”më thonin gjë, kur mësova për emrat e tyre.
Gazetarja: Mësuat më pas, çfarë përfaqësojnë?
Vangjel Dule: Nuk e di. U pyeta nga organet e rendit, që dua ti falenderoj për reagimin e tyre të menjëhershëm. Nuk bëra kallëzim, edhe pse kjo protestë nuk ka asgjë të përbashkët me një protestë të civilizuar.
Kur pashë pamjet më pas, ato mesazhe që u përcollën kishin një domethënie më të komplikuar, nxitëse të një fryme urrejtjeje dhe një ton kërcënimi, që nuk më drejtohej mua personalisht. U drejtohej atyre si personave dhe bindjeve, që unë përfaqësoj. E konsideroj të mbyllur, por të mos harrojmë nxitësit e aktit.
Gazetarja: Për kë dyshoni?
Vangjel Dule: Sjellje të tilla, i frymëzon kryeministri Rama.
