Partia Demokratike me anë të deputetit Luan Baçi ka denoncuar arrestimet e blegtorëve nga policia, 3 orë pas protestës në Levan të Fierit.
Deputeti Luan Baçi tha nga selia e PD se, blegtorëve nga Fieri, Vlora dhe nga gjithë Shqipëria i sigurojmë për mbështetjen e pakursyer të Partisë Demokratike.
Deklarata e plotë e deputetit të PD, Luan Baçi:
Pesë fermerë që kanë protestuar sot në Levan te Fierit kundër monopolit të fabrikave të qumështit dhe uljen e çmimit të produkteve të tyre janë arrestuar.
Alket Çobo, Ervin Resuli e protestues të tjerë, janë shoqëruar në mënyrë te dhunshme nga banesat e tyre 3 orë pas përfundimit te protestës.
Ky është akti i radhës që qeveria e Edi Ramës bën kundër shqiptarëve që dalin në rrugë për të mbrojtur të drejtat, dinjitetin dhe bukën e përditshme të fëmijëve.
Ministri Balla, që lë të lirë mafiozët dhe arreston blegtorët, kreu sot një turp kombëtar. Kjo është një përpjekje për të frenuar intensifikimin e një greve kombëtare nga blegtorët shqiptarë.
Ne u bëjmë thirrje Ballës dhe larove të tij në polici të mos bëjnë akte antiligjore për të cilat do të përgjigjen nesër.
Blegtorët, nga Fieri, Vlora dhe nga gjithë Shqipëria i sigurojmë për mbështetjen e pakursyer të Partisë Demokratike.
Protesta e blegtorëve nuk është shfaqje nga ato që bën qeveria, por klithmë nevoje. Është nxitur nga ulja drastike e çmimeve të qumështit nga fabrikat përpunuese, nga 180 lekë për litër vjet, në vetëm 120 lekë për litër sot. Kjo ka sjellë një krizë mbijetese për blegtoret, duke i detyruar disa prej tyre të mbyllin bizneset ose të therin tufat.
Blegtorët kanë paralajmëruar për intensifikimin e protestave, përfshirë bllokimin e rrugëve dhe refuzimin demonstrativ të dorëzimit të qumështit.
Ne do t’i mbështesim.
Beteja e çdo shqiptari për jetë më të mirë dhe dinjitet është edhe betejë e Partisë Demokratike.
O sot, o kurrë!
