Një ngjarje e rëndë ka ndodhur mëngjesin e kësaj të diele në fshatin Vig të Burrelit. Një 52 vjeçar i identifikuar si Petrit Kuka, është qëlluar për vdekje me armë gjahu nga 63 vjeçari Islam Meta.
Nga burimet policore bëhet me dije se vrasja është hakmarrje ndaj një ngjarjeje të vjetër të 11 viteve më parë.
Raportohet se në vitin 2013, viktima (Petrit Kuka) për motive të dobëta ka plagosur vajzën e 63 vjeçarit, dhe pas 11 viteve ky i fundit ka marrë hak për të bijën.
Kuka ishte i dashuruar me vajzën e Islam Metës dhe kërkoi të fejohej me të, por familja e vajzës nuk e pranoi dhe e fejuan me dikë tjetër. Për t’u hakmarrë Petrit Kuka e plagosi vajzën kur ajo u fejua dhe prej asaj ngjarjeje marrëdhëniet kanë qenë konfliktuale mes dy familjeve.
Pasi ka kryer krimin ditën e sotme, Islam Meta, ka telefonuar Policinë, ka treguar mbi rrethanat e ngjarjes dhe më pas ka kërkuar të vetëdorëzohet.
Njoftimi i policisë:
“Më datë 21.01.2024, në fshatin Vig, në Burrel , shtetasi I. M., rreth 63 vjeç, ka vrarë me armë gjahu shtetasin P. K, rreth 52 vjeç.
Autori i dyshuar i kësaj ngjarje, pasi ka kryer krimin ka telefonuar Policinë dhe ka treguar mbi rrethanat e ngjarjes dhe më pas ka kërkuar të vetëdorëzohet.
Nga hetimet paraprake të kryera dyshohet se ngjarja ka ndodhur për arsye se, viktima shtetasi P.K., në vitin 2013, për motive të dobëta ka plagosur vajzën e shtetasit I.M.
Shërbimet e Policisë kanë shkuar menjëherë në vendngjarje dhe po bëjnë shoqërimin e shtetasit I.M , në komisariat.
Grupi hetimor nën drejtimin e Prokurorisë po punon për zbardhjen e plotë të rrethanave të ngjarjes.”
