Deputeti i PD-së, Lulzim Basha ka dalë pasditen e kësaj të premteje në një konferencë për mediat, ku ka paralajmëruar se ditën e hënë do të depozitojnë në Kuvend një amendament për buxhetin që u miratua për katër minuta, duke kërkuar rialokim të rreth 5 mld lekë të reja ndihmë ushtarake për Kosovën.
Basha tha më tej se opozita jo vetëm thjesht të tregojë plagët dhe shkaktarin e saj, por edhe të kërkojë hapa aktivë, dhe ky do të jetë i pari, sipas tij.
“Ka qenë një javë intensive, me zhvillime që kanë kapluar tv, por zhvillime të thera më të rëndësishme kanë mbetur pa u sqaruar. Nga këto do të veçoja 3. Gjatë javës që po lëmë pas, është përvijuar edhe më qartë kërcënimi që i paraqitet paqes dhe stabilitetit në rajon, në veçanti Kosovë, nga revanshizmi i Serbisë nën dogmën e botës serbe. Hapi i fundit sulmi terrorist në Banjskë, ende i pahetuar, por ajo që po vlon në Beograd, sipas deklaratave të lidershipit serb, është armatosja e Serbisë për një revansh në Kosovë.
Partnerët tanë strategjikë i kanë bërë të qarta qëndrimet e tyre. Në Tiranë nuk dëgjohet gjë tjetër veç kukuvajkave të mëngjesit te Kryeministria apo Kuvendi, dhe ato të darkës, e dini vetë ju ku. Asgjë për sigurinë kombëtare. Ky që është në pushtet bën teatër me regji për zhvillime pseudo-politike. Opozita duhet të bëjë detyrën e vet në drejtim të Kosovës. Ka në dorë jo thjeshtë të tregojë me gisht plagën, të vejë para përgjegjësisë shkaktarin e kësaj plage, por dhe të kërkojë hapa aktivë. Ndaj të hënën do depozitojë në Kuvend një amendament të megabuxhetit t që u kalua për 4 minuta ku do të kërkojë rialokim të rreth 5 miliardë lekëve të reja ndihmë ushtarake për Kosovën”, tha Basha.
