Nënkryetari i Kuvendit, Agron Gjekmarkaj, në një intervistë për SYRI TV, tha se Lulzim Basha është thjesht një pupac i Taulant Ballës, pasi as Edi Rama nuk po e begenis më.
“Ia kam kërkuar zotit Basha që të japë dorëheqjen dhe të mos kthehet më. Ai zgjodhi një rrugë tjetër. Ai ka marrë një vulë, që ende nuk e ka marrë nga gjykata dhe ka ikur në drejtim të paditur. Ose në drejtimin që e çon drejt qeverisë ose drejt shërbestarisë ndaj pushtetit. Duke ulur shumë kujtimin për dhjetë vite sakrifica që kemi bërë secili nga ne që ai të kryeministër dhe një shef dinjitoz i opozitës. Na vjen keq kur e shohim sot si një pupac në duart e ministrit të Brendshëm. Sepse nga informacionet nga kolegët socialistë, kryeministri me gjasa nuk e begenis shumë dhe ia ka lënë zotit Taulant ta menaxhojë. Kjo është e rëndë sepse është i ulur në anën ku është opozita, mban peng vulën e PD, mban peng siglën e PD, fondet e saj, por më shumë i jep mundësi pushtetit të bëjë diversion për një opozitë të përçarë, kur ne po bëjmë gjithçka që opozita jo të jetë e bashkuar në parlament se në parlament e ka arritur bashkimin, por të bashkohet në çdo qelizë të Shqipërisë dhe të kemi PD-në moderne, konkurruese dhe fituese”, tha Gjekmarkaj.
Ai komentoi edhe ‘shuplakën’ e ndërkombëtarëve për mashtrimin e radhës të Bashës.
“Zoti Basha me sa kuptoj ka një raport organik specifik me gënjeshtrat dhe ka menduar që po e lëshoj njëherë me shpresën se do të kalojë, do ua shesë njerëzve si mbështetje ndërkombëtare, si mbështetje amerikane, angleze, e BE. Mirëpo këto janë shtete dhe organizata mjaft serioze që nuk tolerojnë gjëra të tilla dhe siç e patë, reaguan në unison, reaguan njëzëri dhe e lanë të vetmuar në gënjeshtrën e tij”, tha Gjekmarkaj.
Megjithatë ai mendon se dera e PD duhet të jetë e hapur për këdo.
“Unë mendoj se duhet t’i hapet dera çdokujt që PD të bashkohet, të kthehet e fortë, duke ruajtur secili në një parti moderne nuancat e veta, autonominë e mendimit. Në këtë kontekst mendoj se nuk duhet t’i mbyllet dera askujt. Por kjo nuk mund të ndodhë duke shpresuar pa fund. Sepse nëse ti bën opozitë dhe ai i shërben qeverisë, atëherë rrugët ndahen sepse atëherë je ambasador i qeverisë te opozita”, tha Gjekmarkaj.
Sipas tij, Rama do e përdorë Bashën edhe për çështjen e reformës zgjedhore.
“Kam përshtypjen se Edi Rama nuk do i japë asgjë. Do e përdorë sepse i konvenon diversioni në kampin opozitar. I konvenon ta ketë partner në një reformë zgjedhore që nuk po e bën me opozitën e vërtetë”, tha ai.
