Prokuroria e Posaçme ka njoftuar kreun e PD-së Sali Berisha dhe dhëndrin e tij, Jamarbër Malltezi se këtë javë do të merren në pyetje si persona nën hetim për çështjen e privatizimit të ish-kompleksit “Partizani”. Më konkretisht, Jamarbër Malltezi do të merret në pyetje ditën e nesërme (e mërkurë), ndërsa Sali Berisha do të merret në pyetje ditën e enjte.
Kjo do të jetë hera e parë që Sali Berisha do të paraqitet në SPAK për të dëshmuar në lidhje me këtë dosje, pasi herët e tjera ka refuzuar të shkojë. Si Berisha po ashtu edhe Malltezi ndodhen nën masën e sigurisë “arrest shtëpie” në lidhje me këtë çështje.
Por, avokatët e Sali Berishës kanë kërkuar shtyrjen e seancës, pasi nuk mund të jenë të pranishëm. Kërkesën drejtuar Prokurorisë së Posaçme Antikorrupsion e ka konfirmuar për mediat avokati Sokol Mëngjesi. Sipas tij, kanë një agjendë tjetër dhe nuk mund të vijnë në orën 10:00 për të shoqëruar Berishën.
Kujtojmë se avokatët e Berishës e kanë ankimuar në Gjykatën e Posaçme të Apelit vendimin e GJKKO-së për zëvendësimin e masës së sigurisë nga “detyrim parqitje” në “arrest në shtëpi” me mbikqyrje policore, ku i ndalohen dhe kontaktet me personat e tjerë, përveç se me familjarët që qëndrojnë në të njëjtën banesë.
Avokatët e Berishës e konsideruan si një vendim të pavlefshëm, pasi sipas tyre, nuk ka asnjë dispozitë në kodin penal material ose procedural të Republikës së Shqipërisë, që përcakton se liria e komunikimit të një personi mund të kufizohet në kushtet e arrestit të shtëpisë.
“Për më tepër, liria e shprehjes dhe e organizimit politik janë liri themelore kushtetuese dhe si të tilla për zbatimin e tyre në rastin e deputetëve të kuvendit duhet të kërkohet autorizim i posacëm nga Kuvendi i Shqipërisë. Çdo vendim i marrë në kundërshtim me këtë procedure është i paligjshëm dhe si i tillë, i pavlefshëm.” – u shprehën ata në një deklaratë për mediat.
Si ish-kryeministri Sali Berisha, po ashtu edhe avokatët e tij dhe Partia Demokratike e kanë konsideruar vendimin e GJKKO-së, si të diktuar nga kryeministri Edi Rama për të goditur opozitën dhe për t’i mbyllur gojën kreut të saj.
Ditën e djeshme, avokati i Berishës, Sokol Mëngjesi i është drejtuar me një kërkesë SPAK-ut ku i kërkohet që liderit demokrat t’i jepet leje për shkuar në seancat plenare në Kuvend. Kërkesa do të shqyrtohet nga dy prokurorët e SPAK, Arben Kraja dhe Enkelejda Millonai.
Ndërkohë deputetët dhe simpatizantët demokratë i kanë shkuar Sali Berishës pothuajse çdo ditë në mbështetje poshtë pallatit ku banon, teksa pritet që të mblidhen edhe ditën e sotme rreth orës 17:00.
Berisha akuzohet nga SPAK për kryerjen e veprës penale “Korrupsioni pasiv i funksionarëve të larte shteterore ose te zgjedhurve vendore, kryer në bashkëpunim. Ish-kryeministri i ka konsideruar akuzat ndaj tij dhe dhëndrit të tij Jamarbër Malltezi, si sulm politik, pasi sipas tij, nuk ka asnjë fakt dhe dokument që të ngrihen dyshimet mbi akuzat.
Sipas SPAK-ut, Berisha në kohën kur ka qenë kryeministër ka vendosur në funksion të interesave të dhëndrit të tij bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”.
Ndërsa, për Jamarbër Malltezin dhe ndërtuesin Fatmir Bektashi, SPAK-u deklaron se ata kanë përfituar shuma të mëdha financiare nga tjetërsimi i truallit në ndërtime të larta. Mbi këta dy të fundit rëndojnë akuzat për veprat penale “Korrupsioni pasiv i funksionareve te larte shtetërore ose te zgjedhurve vendore”, kryer në bashkëpunim dhe “Pastrimi i produkteve te veprës penale ose veprimtarisë kriminale”.
