Të mandatuarit e Edi Ramës dhe Lulzim Bashës në Komisionin e Reformës Zgjedhore duket se kanë gjetur gjuhën e përbashkët për të rinisur punën për ndryshimin e ligjit zgjedhor.
Dy bashkëkryetarët Damian Gjiknuri dhe Enkelejd Alibeaj kanë hedhur firmat e tyre mbi letrën dërguar prezencës se OSBE ne Tirane ku i kërkohet eksperte në fushën e zgjedhjeve për të asistuar punën e këtij komisioni.
Lëvizjet për Reformën Zgjedhore i konfirmoi dhe Lulzim Basha. Në një prononcim për gazetarët pas përfundimit të seancës plenare, Basha kërkoi që komisioni të nisë punën këtë javë.
“Me vendimin nr. 12, datë 10.02.2022, të ndryshuar, Kuvendi i Shqipërisë ka miratuar ngritjen e Komisionit të Posaçëm Parlamentar për realizimin e Reformës Zgjedhore. Komisioni ka për detyrë hartimin e ndryshimeve legjislative për reformën zgjedhore, në veçanti trajtimin e rekomandimeve të raporteve të OSBE/ODIHR-it për zgjedhjet e 25 Prillit 2021 dhe për zgjedhjet e mëparshme të patrajtuara, rekomandimeve të institucioneve përgjegjëse për zgjedhjet, të partive politike parlamentare dhe organizatave jofitimprurëse”, thuhet në letrën e publikuar në media.
Për këtë arsye, vijon letra, “ashtu siç ramë dakord me përfaqësues të OSBE/ODIHR-it në takimin e zhvilluar në Dhjetor 2023, ku diskutuam punën e Komisionit dhe nevojën që pranë Komisionit të vendoset në dispozicion ekspertiza e ODIHR-it, kemi kënaqësinë që në emër të Komisionit të Posaçëm Parlamentar për Realizimin e Reformës Zgjedhore t’ju paraqesim kërkesën për të kontribuuar me ekspertë të fushës së zgjedhjeve, të ODIHR-it, për të asistuar punën e këtij Komisioni”.
“Mënyra e komunikimit të ekspertëve të caktuar nga ju, me Komisionin e Reformës Zgjedhore, mund të përcaktohet në vijim të bashkëpunimit tonë të mëtejshëm. Duke ju falënderuar paraprakisht për gatishmërinë dhe bashkëpunimin tuaj”, përfundon letra e firmosur nga bashkëkryetarët e komisionit bipartizan të Reformës Zgjedhore, Damian Gjiknuri dhe Enkelejd Alibeaj, të cilët sipas raportimeve mediatike, kanë zhvilluar një takim së bashku më herët gjatë ditës.
Më herët, PD e drejtuar nga Sali Berisha ka kërkuar përjashtimin e Enkelejd Alibeajt si nënkryetar i Komisionit të Posaçëm për Reformën Zgjedhore, pasi e konsideron atë dhe Bashën “vegla” të kryeministrit Edi Rama.
Nga ana tjetër, Lulzim Basha sinjalizoi sot se nuk ka ndërmend të tërhiqet dhe do të vijojë bashkëpunimin me Ramën.
