Pak javë më parë, ministri i Brendshëm, Taulant Balla njoftoi se mjetet luksoze të konfiskuara dhe sekuestruar nga krimi i organizuar nuk do të nxirreshin më në shitje, por do të viheshin në përdorim të Policisë së Shtetit.
Një prej mjeteve luksoze të sekuestruara është dhe makina tip “Mercedes-Benz, V8 biturbo”, që i përkiste ish-miss “Univers Albania 2018”, Trejsi Sejdinit. Mjeti në treg kap vlerën mbi 100 mijë euro.
Trejsi Sejdini deklaroi se këtë automjet e kishte marrë dhuratë për ditëlindje, por makina nuk ishte në emër të saj, por ishte në zotërim të Leonard Dukës, një personazh i njohur i botës së krimit. Mjeti luksoz u sekuestrua nga autoritetet në shtator të vitit 2019.
Ndërkohë, ky mjet tashmë është vënë në shërbim të shtetit. Siç shihet dhe në fotot e mëposhtme, makina tip “Mercedes-Benz, V8 biturbo” është stampuar me logo të Policisë së Shtetit dhe ndodhet para godinës së Ministrisë së Brendshme.
