Nga Boldnews.al
“Arresti në shtëpi” për Sali Berishën vendosi në një kurs përplasjeje Partinë Demokratike të Rithemelimit me Strukturën e Posaçme Anti-Korrupsion.
Përfaqësuesit kryesorë të opozitës kanë paraqitur argumenta të ndryshëm se masa ndaj Berishës është më shumë politike se sa ligjore, një qëndrim që e ka analizuar edhe “Boldnews.al”.
Por, ajo që krijon një lloj shkarjeje, një lloj devijimi nga ky qëndrim politik është deklarimi i dhënë në fundjavën e kaluar nga Belind Këlliçi, anëtar i kryesisë së Partisë Demokratike dhe njëkohësisht fytyra publike e denoncimit me fakte e dokumenta për aferën e inceneratorëve.
Këlliçi i bëri thirrje SPAK-ut që të hetojë se kush ka nxjerrë të dhënat e sistemit TIMS për prokurorin e Prokurorisë së Posaçme, Klodian Braho, të cilat, në vlerësimin e tij, po përdoren si shantazh ndaj tij nga grupi kriminal i “bosit të inceneratorëve”, Mirel Mërtiri.
Klodian Braho ka hetuar aferën e inceneratorit të Elbasanit, e cila ishte çështja e parë ku Mirel Mërtiri u mor i pandehur dhe u dënua.
Në një formë kundërpërgjigjeje, Mërtiri ka siguruar në mënyrë të paligjshme dokumenta, të ngjashme me ato të TIMS-it, ku thuhet se Klodian Braho ka udhëtuar jashtë Shqipërisë me një eksponent të krimit të organizuar, Bledar Gavelli dhe ka dorëzuar kallëzim penal ndaj prokurorit.
Nuk është hera e parë që Mirel Mërtiri përdor një formë të tillë reagimi. “Boldnews.al” është prej vitesh në proces gjyqësor me Mërtirin, pasi u përballë me një padi “për shpifje”, nga ato që konsiderohen si “padi për mbyllje goje ndaj medias”.
Pra, Mirel Mërtiri është në rolin e tij. Por, ajo që nuk bën sens, është mënyra se si i qaset opozita, nëpërmjet Belind Këlliçit, kësaj situatës Braho-Mërtiri.
Nga njëra anë është shumë e drejtë që të kryhen hetime për nxjerrjen e të dhënave konfidenciale të TIMS-it për një prokuror të posaçëm, megjithëse ende nuk ka një version zyrtar nëse ato që lidhen me Klodian Brahon janë autentike.
Por, nga ana tjetër, opozita, nëpërmjet Këlliçit, duket se nuk është aspak e shqetësuar që ato të dhëna, nëse janë të vërteta, pavarësisht mënyrën se si kanë dalë dhe kush i ka nxjerrë, dëshmojnë për korruptim deri në thelb të Reformës në Drejtësi.
Opozita nëpërmjet Këlliçit, për hir të disa kalkulimeve të vogla momentale, nuk ka asnjë shqetësim që prokurori Klodian Braho kaloi vetingun pa asnjë ankim, megjithëse ai u konfirmua në detyrë me një shumicë shumë të brishtë.
Për opozitën, e përfaqësuar në këtë rast nga Këlliçi, nuk ka shqetësim se përse strukturat e rivlerësimin e konfirmuan në detyrë prokurorin Braho, duke anashkaluar tërësisht faktet, nëse janë të tilla, të udhëtimeve të tij me eksponentë të krimit të organizuar.
Opozita në tërësi ka të drejtë kur ngre pretendimin se “Reforma e drejtësisë” u përdor si një kallauz për të penetruar në nivelet e larta të gjyqësorit dhe prokurorisë elementë të lidhur me komunizmin.
Arben Kraja, një prej prokurorëve të dosjes kundër Berishës, ka qenë hetues në periudhën e komunizmit. Për këtë fakt, opozita ngre shpesh herë zërin lart, duke e përmendur si një shembull për të treguar korruptimin politik të “Drejtësisë së re”.
Por, ky qëndrim parimor i opozitës, përfaqësuar nga Këlliçi, këputet në mes kur përballë janë faktet e dyshuara si të vërteta për udhëtimet e prokurorit Klodian Braho me element kriminalë.
Nuk dihet nëse Braho ka udhëtuar vërtetë me Gavellin. Këtë duhet ta tregojnë hetimet. Këtu duhet të këmbëngulë edhe opozita. Të hetohet Klodian Braho dhe, nëse çdo gjë del sajesë, atëherë ka të gjithë të drejtën e Zotit që të ngrejë zërin dhe të flasë për shantazh kundër një prokurori të SPAK-ut.
Por, derisa vetë prokurori apo struktura ku ai punon nuk i kanë mohuar publikisht ato të dhëna të TIMS-it, atëherë nxjerrja e të dhënave konfidenciale duhet të jetë shqetësimi më i vogël i opozitës.
Shqetësimi kryesor është që në “strukturën elitë të hetimit” ushtron funksionet një prokuror që udhëton me element të krimit të organizuar.
Nuk mund të jetë shqetësimi vetëm “Arben Kraja komunisti” që po heton Berishën dhe të mos ketë asnjë shqetësim për “Klodian Brahon, bashkëudhëtarin e kriminelit”, madje edhe të përkëdhelet, vetëm e vetëm për faktin se ai ka në dorë dosjen për “5 drejtorët e Bashkisë së Erion Veliajt”.
SPAK-u ka 17 prokurorë në detyrë dhe pritet që së shpejti t’i shtohen edhe tre. Pra, ka plot njerëz që, nëse kanë vullnet, mund të hetojnë jo vetëm “5 drejtorët”, por edhe çdo invidiv tjetër me pushtet.
Rëndësi ka që, më së pari, prokurorët të jenë vetë të pastër dhe pa të shkuar, të cilët mund t’i vendosë nën shantazh permanent.
