Për Shoqatën e Gazetarëve Profesionistë të Shqipërisë, gjobitja e “Boldnews.al” nga gjyqtari i Tiranës, Besnik Hoxha, në një proces penal për ‘Shpifje” ndaj Mirel Mërtirit, është “një tentativë për mbylljen e gojës së medias”, e cila ka raportuar dhe denoncuar aferën e inceneratorëve në Shqipëri.
Në një reagim të publikuar pasditen e së Premtes, Shoqata e Gazetarëve Profesionistë vendoset në krah të redaksisë së “Boldnews.al”, duke e vlerësuar se vendimi i gjyqtarit Hoxha “synon njollosjen dhe dekurajimin e gazetarëve, të cilët kanë kurajon të raportojnë, pavarësisht lidhjeve apo ndikimit deri në nivelet më të larta të personave, subjekt i denoncimeve mediatike”.
Më poshtë është deklarata e plotë e Shoqatës së Gazetarëve Profesionistë të Shqipërisë:
“Shoqata e Gazetarëve Profesionistë të Shqipërisë mbështet shqetësimin e gazetarëve të medias “Boldnews.al”, pas vendimit të gjykatës për ta gjobitur me 100 mijë lekë këtë media, duke e konsideruar si shpifje, identifikimin në një shkrim nga #Boldnews të një biznesmeni shqiptar, në një foto të publikuar nga mediat në Zimbabve, në kuadër të një skandali, ku personi i identifikuar nga #Boldnews gjendej me Presidentin e Zimbabves dhe ministrin e shëndetësise, i arrestuar për abuzim me fondet publike.
Vetë vlera e “gjobës” ngre dyshime për nivelin e shpifjes, pasi duket se në rastin konkret është ndëshkuar raportimi i #Boldnews dhe kjo është shqetësuese. Eshtë shqetësuese sepse një vendim i tillë, edhe me atë vlerë modeste monetare, synon njollosjen dhe dekurajimin e gazetarëve, që kanë kurajon të raportojnë, pavarësisht lidhjeve apo ndikimit deri në nivelet më të larta të personave, subjekt i denoncimeve mediatike.
Shoqata e Gazetarëve Profesionistë të Shqipërisë shpreh shqetësimin për këtë tentativë të “mbylljes së gojës” së një medie, si dhe për influencën e padenjë të që ushtrohet ndaj mediave e në kurriz të tyre, vetëm sepse kryejnë misionin që kanë: informimin e publikut”.
Të enjten e kësaj jave, gjyqtari i Tiranës, Besnik Hoxha, i mbështetur nga prokurori Isa Jata, vendosi të shpallte fajtor dhe të dënonte redaksinë e “Boldnews.al” për raportimet mbi personazhin Miren Mërtiri, si edhe lidhjet e tij e bashkëpunëtorëve të ngushtë të tij, me nivelet e larta qeveritare, për të realizuar atë që konsiderohet nga redaksia si “sipërmarrje korruptive dhe kriminale e inceneratorëve”.
Procesi i nisur nga Mirel Mërtiri kundër redaksisë së “Boldnews.al” është saktësisht një prej atyre që konsiderohen “SLAPP-Të të hedhin në gjyq sepse ke folur”.
Këto vendime gjyqësore, të shëmtuara për ata që i firmosin, natyrisht nuk e stepin median të thotë të vërtetën.
/BoldNews.al/
