SPAK ka dhënë pretencën për ish-kryetarin e Bashkisë së Kukësit, Safet Gjici dhe Alma Kaçin, gruan me të cilën ai u filmua duke kryer marrëdhënie seksuale në ambientet e zyrës së tij.
Prokuroria ka kërkuar 4 vjet e 6 muaj burg, dhe nga gjykimi i shkurtuar dënimi përfundon me 3 vite. Ndërkohë, për Alma Kaçin, SPAK ka kërkuar 1 vit e 6 muaj, ndërsa nga gjykimi i shkurtuar dënimi i konvertohet në vetëm 1 vit heqje lirie. Seanca e radhës është caktuar për në 25 janar.
Në seancën paraardhëse, të pandehurit konfirmuan qëndrimin e tyre për gjykim të shkurtuar, ndërsa SPAK pretendoi se filmimi i video-skandalit në Bashkinë Kukës të jetë bërë me vullnet të plotë nga Alma Kaçi. Sipas SPAK, nga provat e administruara, ka rezultuar se pas favorit seksual të marrë nga Gjici, mes tij dhe Kaçit është bërë një bisedë ku kryebashkiaku e drejton Kaçin për te nënkryetari Granit Gjana, për të folur mbi tenderin për strehimin e qenve endacakë. Në banesën e Kaçit, është gjetur një USB, që përmbante filmimin bruto të aktit seksual në zyrën e Bashkisë.
Kaçi ka pretenduar se filmimin e ka bërë në kuadër të një emisionit investigativ, pasi, sipas saj, ishte gazetare e padeklaruar e këtij programi. Sipas SPAK, në telefonin e Kaçit, iu gjetën biseda mes saj dhe gazetarëve të emisionit investigativ, ku Kaçi fliste për këtë filmim, por nuk është provuar një marrëveshje mes tyre. Në një tjetër deklarim, Kaçi ka pretenduar se për filmimin ka pasur dijeni edhe ish-kreu i Qarkut Kukës, Abedin Oruçi, që, sipas saj, ia kishte marrë me forcë USB-në. Por, ky pretendim i saj nuk ka gjetur mbështetje në prova të tjera.
Safet Gjici akuzohet për veprën penale të “Korrupsioni pasiv i funksionarëve të lartë shtetërorë ose i të zgjedhurve vendorë”. Ish-kryebashkiaku ndodhet pas hekurave nën masën e sigurisë “arrest në burg”. Pavarësisht ankimeve me të cilat i është drejtuar gjykatës për masën, nuk është lënë i lirë.
E pandehura tjetër e çështjes Alma Kaçi akuzohet për veprën penale “Korrupsioni aktiv i funksionarëve të lartë shtetërorë ose i të zgjedhurve vendorë”. Ajo është hetuar me masën e sigurisë “arrest në shtëpi”.
Masat janë ekzekutuar pas shfaqjes në media të pamjeve ku dukej Alma Kaçi dhe Safet Gjici teksa konsumonin një raport intim në zyrën e Gjicit, në Bashkinë Kukës. Pas raportit, Gjici i premton Kaçit një projekt nga bashkia për sterilizimin e qenve.
“Në përfundim të hetimeve paraprake të këtij procedimi penal, janë përftuar prova dhe të dhëna nga analizimi i të cilave ka rezultuar se e pandehura Alma Kaçi, është personi që i ka ofruar/dhënë përfitime të parregullta të pandehurit Safet Gjici, me detyrë Kryetar i Bashkisë Kukës dhe se ky i fundit pasi ka përfituar prej saj përfitimin e parregullt, në formën e favorit seksual, ka premtuar/pranuar ta ndihmojë me projektin e saj të mbrojtjes së qenve dhe ta paraqiste më tej në mbledhje të Këshillit Bashkiak të Bashkisë Kukës”, ka njoftuar më herët SPAK.
Vetë Gjici nuk e pranuar akuzën penale. “Nuk ka asnjë fakt, asnjë provë, asnjë firmë a vendim që të provojë se e kam kryer veprën penale. Është çështje e sajuar nga ushtarë politikë”, është shprehur Gjici gjatë një prej seancave gjyqësore.
Mbetet e paqartë ndërkohë si rrodhi video në media.
Pas publikimit të pamjeve, Safet Gjici dha dorëheqjen. Pavarësisht skandalit, me përsëritjen e zgjedhjeve lokale në Kukës, socialistët fituan sërish bashkinë.
