Partia Demokratike ka përshëndetur deklaratën e përfaqësuesve të OSBE-së në Shqipëri për reformën zgjedhore, pas deklaratës së kryeministrit Edi Rama, i cili deklaroi se duhet të marrin fund komisionet bipartizane për këtë reformë.
Reagimin në emër të PD-së e ka bërë nënkryetari i partisë, Oerd Bylykbashi, i cili shprehet se “qëndrimi i OSBE-së që reforma zgjedhore të përfshijë të gjitha partitë zgjidhjet dhe ndryshimet në ligjin zgjedhor dhe ligjet e tjera duhet të materializojnë qëllimet e përbashkëta, është plotësisht në përputhje me qëndrimin e PD dhe opozitës që reforma zgjedhore të jetë konsensuale dhe gjithëpërfshirëse”.
Më tej, ai shprehet se Rama synon të shmangë adresimin me konsensus të rekomandimeve të ODIHR për shitblerjen e votës, presionin mbi zgjedhësit, cënimin e sekretit dhe lirisë së votës, shkrirjen e shtetit me partinë në pushtet dhe përdorimin e shtetit për të fituar zgjedhjet. Sipas Bylykbashit, Rama kërkon të vendosë me ligj rregullat për vjedhjen e zgjedhjeve duke kërkuar 84 votat në shkëmbim të pazareve siç ka bërë vazhdimisht.
Reagimi i plotë:
Partia Demokratike përshëndet deklaratën e Prezencës së OSBE-së në Shqipëri, e cila përfshin qëndrimin e partnerëve kryesorë ndërkombëtarë, në lidhje me reformën zgjedhore si dhe mirëpret gatishmërinë e organizatës për t’u angazhuar me ekspertizë në procesin e reformës, në përputhje me traditën dhe kontributin më shumë se 20-vjeçar të OSBE-së.
Reforma zgjedhore është në qendër të debatit sepse dhunimi i zgjedhjeve të 14 majit 2023 dhe shkelja brutale e parimeve kushtetuese dhe ligjit zgjedhor nga kryeministri Edi Rama në bashkëpunim me krimin, janë në themel të krizës politike që ka kapluar vendin.
Qëndrimi i OSBE-së që reforma zgjedhore të përfshijë të gjitha partitë zgjidhjet dhe ndryshimet në ligjin zgjedhor dhe ligjet e tjera duhet të materializojnë qëllimet e përbashkëta, është plotësisht në përputhje me qëndrimin e PD dhe opozitës që reforma zgjedhore të jetë konsensuale dhe gjithëpërfshirëse si në proces dhe në rregullat e përbashkëta për zgjedhje të lira e të ndershme.
Deklaratat e Ramës për reformën që anatemojnë traditën konsensuale 20-vjeçare të komisioneve parlamentare bipartizane, mazhorancë-opozitë, që ka garantuar dy rotacione politike me zgjedhje në 2005 dhe 2013, për shkak sepse Rama synon të shmangë adresimin me konsensus të rekomandimeve të ODIHR për shitblerjen e votës, presionin mbi zgjedhësit, cënimin e sekretit dhe lirisë së votës, shkrirjen e shtetit me partinë në pushtet dhe përdorimin e shtetit për të fituar zgjedhjet.
Rama kërkon të vendosë me ligj rregullat për vjedhjen e zgjedhjeve duke kërkuar 84 votat në shkëmbim të pazareve siç ka bërë vazhdimisht.
Partia Demokratike kërkon, në të njëjtën frymë me qëndrimin e OSBE bërjen me konsensus të reformës, që opozita të caktojë vetë dhe jo të caktojë qeveria kush bashkëdrejton komisionin dhe përfaqësimin e saj në komision.
Çdo qëndrim refuzues për kërkesa të drejta që Partia Demokratike ia ka garantuar Partisë Socialiste në opozitë në vitet 2005-2013, tregon vetëm synimin e Edi Ramës që në zgjedhjet e 2025 jo vetëm mos të lejojë votimin e diasporës, por edhe që votat e shqiptarëve të grabiten sërish.
