Pas shumë kohësh mungesë, pasditen e sotme është “zgjuar” Lulzim Basha për të zhvilluar një konferencë për mediat.
Kreu i “vulës” u pyet për masën e sigurisë “arrest shtëpie” ndaj Sali Berishës ku theksoi se nga ana personale ndjen keqardhje për lidershipin e PD-së ndërsa nga ana tjetër, shton se PD duhet të ecë me domosdo përpara dhe të lërë pas të shkuarën.
“Kam dy reagime. Njëri në rrafshin personal dhe tjetri në atë politik. Në atë personal nuk më vjen mirë, keq që një njeri me të cilin kam bashkëpunuar për vite me radhë dhe padiskutim ka dhënë kontributet e veta të përfundojë këtu. Çfarë kam pas për t’i thënë ia kam thënë dhe besoj se e dini. Por në fund secili bën zgjedhjen e vet në jetë dhe duhet të përballet për zgjedhjen që ka bërë.
Kjo është njëra anë e kostos që sjellja e tij i solli të gjithëve, që ka marrë personalisht që ka dhënë familjes, PD dhe vendit. Në rrafshin personal ka keqardhje. Nga ana tjetër, është e domosdoshme që PD të ecë përpara dhe të lërë të shkuarën pas. Jo të shkelë të shkuarën dhe as të mohojë. Dhe përgjigja zyrtare është që në çdo rast, qëndrimi i PD është që drejtësia do të bëjë punën e saj e papenguar dhe çdokush, duke filluar nga unë, duhet të jemi në dispozicion të drejtësisë.”, tha Basha.
Kujtojmë që në kampin blu ka nisur lëvizja për të bashkuar një herë e përgjithmonë opozitën në mënyrë që në zgjedhjet e përgjithshme të vitit të ardhshëm PD-ja dhe partitë e tjera aleate të jenë të unifikuar për të synuar rotacionin politik. Nga bashkimi opozitar janë përjashtuar vetëm dy figura, Lulzim Basha dhe Enkelejd Alibeaj të cilët janë etiketuar si bashkëpunëtorë të Edi Ramës.
