Kuvendi ditën e sotme ka njoftuar se Arben Ahmetaj e ka humbur mandatin e deputetit për shkak se prej 6 muajsh ish-zv/kryeministri nuk është paraqitur në asnjë seancë plenare pasi ndodhet në arrati për t’iu shmangur drejtësisë shqiptare e cila e ka shpallur në kërkim ndërkombëtar për aferën e inceneratorëve.
Vendi vakant që ka lënë Arben Ahmetaj është bërë “mollë sherri” mes socialistëve të cilët po “shqyejnë” njëri-tjetrin për të “rrëmbyer” ose jo mandatin e deputetit.
Sipas rezultateve të zgjedhjeve të fundit parlamentare, mandati i Ahmetajt merret nga Dallëndyshe Bici, aktualisht Drejtoreshë e Kadastrës, e cila sipas burimeve mediatike nuk do të pranojë për shkak të postit “joshës” që zotëron aktualisht.
Bici nuk mund të braktisë Kadastrën që njihet nga të gjithë si një nga dikasteret më të korruptuar të qeverisë së “Rilindjes”.
Për shkak se Bici do të refuzojë mandatin e deputetit, ai i kalon juristit Plarent Ndreca i cili pas reagimit mezi pret që të “rrëmbejë” një pozicion që e ka lakmuar prej kohësh.
Pyetje: Heqja e mandatit të deputetit për socialistin Arben Ahmetaj do të sjellë një emër të ri në Kuvendin e Shqipërisë, ndërsa emri juaj lakohet si deputeti më i ri në Kuvend, e konfirmoni?
“Jo, nuk mund ta konfirmoj sepse është një përgjegjësi e KQZ për ta konfirmuar, sepse për sa kohë nuk kam njoftim nga KQZ, nuk mund ta konfirmoj. Le të presim sepse kjo gjë besoj do të sqarohet shumë shpejt”, tha Ndreca per Vizion plus.
