Pak ditë më parë, kryeministri Edi Rama njoftoi shkrirjen e Ministrisë së Kulturës dhe bashkimin e tre ministrive në një të vetme, atë të Ekonomisë, Kulturës dhe Inovacionit. Drejtimin e kësaj “super ministrie”, Rama ia besoi një prej bashkëpunëtorëve të tij më të vjetër Blendi Gonxhes.
I pyetur gjatë konferencës së sotme me gazetarërt, Rama tha se krijimi i kësaj ministrie nuk u bë për të larguar Elva Margaritin, por sipas tij, erdhi si një nevojë për shkak të zhvillimit të shoqërisë.
Në lidhje me bashkimin e Kulturës me Ekonominë, Rama tha se kjo gjë është bërë që të shfrytëzohet më shumë mundësinë e potencialit që kultura ka për ekonominë e vendit. Sipas tij, kultura është motorri i ekonomisë dhe vendi do të marrë më shumë nga bashkimi i tyre.
“Ministria nuk është krijuar për të larguar Margaritin që ka bërë detyrën, por për të krijuar një strukturë të re që kanë të bëjnë me nevojën e vendit për të ecur më shpejt, duke thyer edhe kufijtë tradicional, ndërkohë kur ekonomia jonë, sektori institucional, që mbulon ekonominë ka nevojë për një shtysë të re të fortë, sepse janë një sërë sfidash që kërkojnë një vëmendje të veçantë, në një kohë kur inovacioni është ekonomi dhe jo vetëm të koordinojë institucionet e reja. Kultura është bashkuar për t’i dhënë mundësi veten që të shfrytëzojmë më shumë mundësinë e potencialit që ka për ekonominë, është edhe motor i ekonomisë dhe kjo nuk ka lidhje me persona, por me nevojën që sistemi të bëhet më efecientë dhe që ne të marrim më shumë nga potenciali që kemi”, – tha kreu i qeverisë.
