Detaje të reja kanë dalë në dritë nga vdekja e 41-vjeçares shqiptare në Selanik, Gjeorgjia Murati.
Mediat greke raportojnë se për vrasjen e 41-vjeçares, është arrestuar partneri i saj dhe një nga miqtë e tij, që ka rrëfyer për policinë se si ka ndodhur ngjarja dhe si ai ka ndihmuar burrin të kryejë aktin ekstrem.
Fillimisht partneri i saj ka tentuar të devijojë hetimet e autoriteteve duke thënë se gruaja ishte zhdukur duke marrë me vete një shumë të madhe parash. Por pas sekuestrimit të kamerave të sigurisë është zbuluar se gruaja është vrarë pikërisht nga burri i saj, i cili pasi e ka qëlluar për vdekje e ka futur në një sënduk dhe e ka lënë në një zonë pyjore të Halkidiki-s, midis Triglia dhe Galatista.
41-vjeçarja shqiptare ishte në muajin e tretë të shtatzënisë dhe priste foshnjën e partnerit që i mori jetën.
