Deputeti i Partisë Demokratike, Tomor Alizoti shprehet se procedura e arrestimit të Sali Berishës është e njëjtë si në diktaturë.
Në ‘Çim Peka LIVE’ në SYRI TV, Alizoti tha se pas ndalimit të liderit të opozitës, Shqipëria nesër gdhihet më autokrate.
“Pse duhet Sali Berishës t’i hiqet fjala? Kë cenon ai me fjalën e tij, ku është rreziku juridik këtu, kriminal apo shoqëror? Njeriut që nga mëngjesi deri në darkë bën denoncime me emra e mbiemra, që askush tjetër nuk i bën, t’i ike edhe kjo mundësi. Atëherë Shqipëria nesër, e nesërmja gdhihet më autokrate. E ta shpjegosh këtë dhe të fshihesh pas procedurave, sepse procedurat në vetvete janë në shërbim të qëllimit. Kush është qëllimi? Të asgjësosh opozitën dhe kjo po ndodh. Pse duhet me urgjencë që të ndalohet lideri i opozitës, të mbajë konferencë te shtëpia e tij. Pse duhet të ndalohet të flasë në Skype apo tjetër. Çfarë e shqetëson kjo SPAK, çfarë problemi mund t’i prishë drejtësisë?
Çfarë provash mund të prishë ai, nëse del e thotë që nesër akuzon në mënyrë politike për fenomene të tjera. Është një arrestim i pastër politik dhe unë kam një bindje dhe kjo është bindja ime. PD dhe vetë Berisha ka gabuar shumë me PS-në, sepse për mua PS-ja është një trashëgimi e Partisë së Punës. Është e njëjta procedurë, që arrestonin në emër të popullit në 5 natës. Dhe sot pikërisht shikoni, dita që është pranë vitit të ri që festojnë shqiptarët, shkojnë e izolojnë doktorin. Ideja është se ajo parti nuk është shkëputur nga historiku i saj. Shikoni dhe njerëzit në SPAK, vijnë nga hetuesia e sigurimit të shtetit. Ata që kanë bërë burg politik e kuptojnë këtë, dhe kanë bërë vetë burg politik e dinë ça është hetuesia’, tha Alizoti.
