Kreu i PD-së, Sali Berisha nuk pritet as ditën e sotme që të paraqitet në Gjykatën e Posaçme të Shkallës së Parë kundër Korrupsionit dhe Krimit të Organizuar, ku do të zhvillohet seanca për ashpërsimin e masës së sigurisë ndaj tij për çështjen e privatizimit të ish-kompleksit “Partizani”.
Seanca gjyqësore pritet të nisë në orën 10:00, por zyre e shtypit të Partisë Demokratike bën me dije se në këtë orë Sali Berisha do të zhvillojë një bashkëbisedim me të rinjtë e FRPD-së në sallën “Pjetër Arbnori” në selinë blu.
Siç duket, edhe në seancën e sotme në GJKKO, lideri demokrat pritet të përfaqësohet përmes avokatëve të tij.
Seancë e sotme në GJKKO vjen pas vendimit të Kuvendit më 21 Dhjetor, i cili miratoi kërkesën e SPAK me 75 vota pro të mazhorancës për heqjen e imuniteti të liderit demokrat.
GJKKO i ka caktuar Sali Berishës masën e sigurisë “detyrim paraqitje” si dhe “ndalim të daljes jashtë shtetit”. Megjithatë, Sali Berisha ka refuzuar që të parqaqitet në gjykatë të hënën e parë dhe të tretë të çdo muaji duke argumentuar se vendimi është antikushtetues, pasi nuk ishte marrë më parë autorizim për heqjen e imuniteti ndaj tij.
Por SPAK i qëndroi mendimit se masa e sigurisë “detyrim paraqitje” si dhe “ndalim të daljes jashtë shtetit” ishin të një karakteri që konsiderohen kufizime dhe jo heqje lirie. Për këtë shkak SPAK ka kërkuar shtrëngimin e masës së sigurisë në “arrest shtëpi”.
Ligji i jep 5 ditë gjykatës për të marrë në shqyrtimin kërkesën e SPAK dhe gjyqtarja Irena Gjoka pritet që në seancën gjyqësore të sotme ka thërritur për të dëgjuar palët, nga njëra anë prokurorët e SPAK dhe nga ana tjetër personin nën hetim Sali Berisha dhe avokatët e tij. Gjyqtarja Gjoka mund të vendosë sot pasi të dëgjojë argumentet e palëve ose të dërgojë në “arrest në shtëpi” Berishën, ose të lërë në fuqi masat e mëparshme.
Berisha akuzohet nga SPAK për kryerjen e veprës penale “Korrupsioni pasiv i funksionarëve të larte shteterore ose te zgjedhurve vendore, kryer në bashkëpunim. Ish-kryeministri i ka konsideruar akuzat ndaj tij dhe dhëndrit të tij Jamarbër Malltezi, si sulm politik, pasi sipas tij, nuk ka asnjë fakt dhe dokument që të ngrihen dyshimet mbi akuzat.
Sipas SPAK-ut, Berisha në kohën kur ka qenë kryeministër ka vendosur në funksion të interesave të dhëndrit të tij bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”. Ndërsa, për Jamarbër Malltezin dhe ndërtuesin Fatmir Bektashi, SPAK-u deklaron se ata kanë përfituar shuma të mëdha financiare nga tjetërsimi i truallit në ndërtime të larta.
