Pas incidenteve të dhunshme në protestën e mbrëmjes së kaluar në Beograd, një tjetër manifestim u mbajt këtë të hënë në kryeqytetin serb.
Këtë herë ishte radha e studentëve për të protestuar me një kërkesë konkrete, atë për të parë listën e votuesve në zgjedhjet parlamentare dhe lokale të javës së kaluar.
Me thirrjen “hapni listat”, studentët rrethuan Ministrinë e Administratës Publike dhe u ulën në rrugë, duke bllokuar për disa orë qarkullimin, në një prej zonave më të frekuentuara në qytetin serb.
Më vonë, ata u zhvendosën në godinën e Ministrisë së Jashtme, ku qëndruan dhe aty për disa minuta.
Opozita vijon të kundërshtojë rezultatin e zgjedhjeve në Serbi, kjo edhe me mbështetjen që mori nga OSBE dhe disa vendeve perëndimore, të cilat panë një numër parregullsish gjatë procesit.
Ditën e djeshme, protestuesit tentuan të hyjnë në sallën e bashkisë së Beogradit dhe u përplasën me policinë, ku shumë prej tyre u lënduan, ndërkohë që pati dhe 35 të arrestuar.
