Kryediplomati italian Antonio Tajani ka lajmëruar se më 22 dhjetor do të vizitojë Shqipërinë, për të parë nga afër vendin ku mund të ngrihen kampet për refugjatët, në bazë të marrëveshjes Rama-Meloni.
Zv.kryeministri dhe ministri i Jashtëm Tajani e bëri me dije këtë lajm, në një prononcim për “Rainews 24”. “Më 22 dhjetor do të jem në Shqipëri dhe do të takoj kryeministrin Edi Rama”, tha ai në konferencën për media.
Ndër të tjera Tajani tha se refugjatët do të kthehen sërish në vendet e origjinës. Ai u shpreh se nuk është i shqetësuar për pezullimin e ratifikimit të marrëveshjes në Kuvend nga Gjykata Kushtetuese e Shqipërisë. Tajani shtoi se çdo rast nuk dëshiron të ndërhyjë në vendimet e Gjykatës Kushtetuese të Shqipërisë.
Kujtojmë se kryeministri Edi Rama dhe homologia e tij, Giorgia Meloni kanë nënshkruar në Romë një marrëveshje për të strehuar në vendin tonë refugjatët nga vendet afrikane që kapen në brigjet italiane. Marrëveshja parashikon ngritjen e dy kampeve në Shëngjin dhe Gjadër, teksa kostot do të mbulohen të gjitha nga pala italiane.
Por, si fillim kjo marrëveshje duhet të marrë “OK-in” e Gjykatës Kushtetuese, e cila vendosi të pezullojë ratifikimin e marrëveshjes nga Kuvendi, ndërsa pranoi të kalojë për shqyrtim padinë e 30 deputetëve të Partisë Demokratike.
