Kryetari i Partisë Demokratike, Sali Berisha, ka marrë fjalën në protestën që po mbahet mesditën e kësaj të hëne, te kryesia e Kuvendit, aty ku po mbahet njëkohësisht edhe mbledhja e Këshillit te Mandateve që do të vendosin për imunitetin ndaj liderit të opozitës.
Gjatë fjalës së tij Berisha u ka bërë thirrje prokurorëve të SPAK të heqin dorë nga çështja, ndërsa theksoi se ata do të trajtohen si fallanga krimit të kreut të Meduzës, që sipas tij, është kryeministri Edi Rama.
Berisha: Kjo është dëshmia më flagrante e një shteti monist, ku parlamenti, prokuroria, policia, ushtria, shërbimi informativ, janë në duart e një njeriu, kontrollohen nga një njeri. Ju duket i fortë ai? Jo, është kalbësirë. Ne që zvarritëm bustin, do e kërrejmë nga pushteti.
Ne u themi SPAK, hiqni dorë mjeranë se kemi përmbysur policinë më të egër sekrete të botës, sigurimit të shtetit, dhe ju nuk ju kemi për asgjë. Ju garantoj se do të bëj përgjegjës për çdo shkelje të ligjit dhe të Kushtetutës dhe se do të trajtoheni njëlloj si falanga krimi të kreut të Meduzës, të kryehajdutit të Shqipërisë Edi Rama.
Në përfundim, Berisha ftoi qytetarët që në datën 27 Dhjetor të mblidhen përpara Gjykatës së Lartë, ku sipas tij Edi Rama ka marrë vendimin për asgjesimin e plotë të Partisë Demokratike. Berisha tha se levizja do të vijojë çdo javë.
“Ju ftoj të mblidhemi në 27 Dhjetor ditën e enjte përpara Gjykatës së Lartë. Edi Rama ka përgatitur vendimin për asgjesimin e plotë të opozitës dhe Partisë Demokratike. Ju ftoj të jemi të pranishëm për t’i dhënë mesazhin tonë të qartë se ne nuk dorëzohemi.“-tha Berisha.
