Djali i ish-kryeministrit Sali Berisha, Shkëlzen Berisha, nuk është paraqitur këtë të enjte në seancën gjyqësore në GJKKO, ku ishte thirrur për të dëshmuar për çështjen e Gërdecit.
I pyetur mbi mungesën e të birit në seancë, ish-kryeministri Sali Berisha u shpreh se Shkëlzeni është thirrur më herët në SPAK dhe ka dhënë çdo përgjigje. Ai ngriti akuza ndaj SPAK-t, se po bën politikë me çështjen dhe se familjarët e kanë kuptuar këtë.
Berisha: “Shkëlzen Berisha është thirr për këtë çështje kohë më parë në skap. Ka dhënë çdo përgjigje. Ka lënë aty adresën fizike dhe elektronike, por ata kanë preferuar të bëjnë më shumë politikë pasi thirrja e tij është një akt i mirëfilltë politik.
Nuk ka asnjë lloj lidhje me asnjë akt, proces, moment të asaj drame që ka ndodhur dhe ai ka dhënë shpjegime. Madje edhe familjarët e kanë kuptuar që këta po bëjnë politikë me tragjedinë e tyre. Ka një njoftim që ka bërë Shkëlzen Berisha se të dyja adresat nuk i ka ndryshuar dhe i ka lënë në SKAP. Të marrësh seriozisht një organ që funksionon me parimet e vjetra të policisë sekrete, funksionon si struktura kriminale nuk duhet marrë seriozisht”.
