Kryeministri Edi Rama ka takuar kancelarin gjerman Olaf Scholz, me rastin e Kongresit të Partisë Social Demokrate që po zhvillohet në Berlin. Përmes një postimi në rrjetet sociale, Rama shprehet se procesi i rinovuar i Berlinit është vetëm një nga shumë sukseset e aleatëve në Berlin. Sipas tij, Shqipëria mbetet e përkushtuar ndaj Procesit të Berlinit.
“Me rastin e Kongresit të SPD në Berlin, falënderoj sinqerisht Olaf Scholz për udhëheqjen e tij. Procesi i rinovuar i Berlinit është vetëm një nga shumë sukseset e miqve dhe aleatëve tanë në Berlin. Shqipëria do të mbetet thellësisht e përkushtuar ndaj këtij procesi si platforma kryesore për bashkëpunimin e nivelit të lartë në Ballkanin Perëndimor”, shkruan Rama.
Vlen të theksohet fakti se më herët, Shqipëria dhe Serbia nisën një projekt të ashtuquajtur “Ballkani i Hapur”, mirëpo më pas njoftuan kjo nismë do të rresht së funksionuari dhe do të përqendrohen te Procesi i Berlinit, i udhëhequr nga Gjermania.
Gjithashtu, edhe kryeministri i Kosovës, Albin Kurti ka zhvilluar një takim me kancelarin e Gjermanisë, Olaf Scholz gjatë Kongresit të PSD në Berlin. Përmes një postimi në rrjetet sociale, Kurti shkruan se bisedoi me kancelarin gjerman për marrëdhëniet dypalëshe dhe vizionin e përbashkët për drejtësi dhe prosperitet.
“Kënaqësi të marr pjesë në kongresin e partisë SPD në këtë vit, ku pata një takim të frytshëm me kancelarin gjerman, Olaf Scholz, ku nënvizuam fuqinë e marrëdhënieve tona dypalëshe dhe vizionin tonë të përbashkët si socialdemokratë që nxisin drejtësinë, përparimin dhe prosperitetin për qytetarët tanë”, shkruan Kurti.
