Shtyhet sërish seanca gjyqësore për Fredi Belerin i cili kërkon leje të betohet si kryebashkiak i zgjedhur i Himarës.
Seanca e radhës do të mbahet më datë 19 dhjetor, ora 14:30. Shtyrja e seancës ka ardhur pasi Beleri ka refuzuar të dëshmojë si i pandehur në sallën e gjyqit, duke pretenduar se nuk ka besim te drejtësia.
Sipas Belerit, Prokuroria ka qenë e njëanshme, duke mos pranuar asnjë kërkesë të tyre.
“Nuk kam besim te drejtësia. Prokuroria është treguar e njëanshme, nuk ka pranuar asnjë kërkesë tonën. Bë dosje ka dokumenta të falsifikuar”, ka thënë Beleri.
Procesi gjyqësor ndaj Fredi Belerit ka marrë një tjetër kthesë këtë të martë. Një nga dëshmitarët kyç të këtij procesi, Abdyl Rama, nuk ndodhet në Shqipëri dhe sipas sistemit TIMS rezulton të ketë dalë nga Shqipëria më 22 korrik dhe se prej asaj kohe nuk kishte hyrë më në Shqipëri.
Kujtojmë që Beleri u arrestua dy ditë përpara zgjedhjeve vendore të 14 majit. Sipas prokurorisë, përgjimet e realizuara tregojnë se ai ka ofruar para në këmbim të votave në favor të tij. Vetë Beleri ka hedhur poshtë akuzat dhe ka folur për një akt me sfond politik.
