Dy persona janë ekstraduar nga Gjermania dhe Spanja për të cilët Gjykata e Posaçme ka caktuar masat e sigurisë “arrest në burg” për veprimtari kriminale të kryera në kuadër të grupeve kriminale.
Interpol Tirana në bashkëpunim me homologët gjermanë kanë bërë të mundur kapjen dhe ekstradimin drejt vendit tonë nga Frankfurti të shtetasit të lindur në Palestinë, Ahmed Sulltan, 33 vjeç. Autoritetet raportojnë se GJKKO i ka caktuar 33-vjeçarit, masën e sigurisë “Arrest në burg”, për veprat penale “Ndihma për kalim të paligjshëm të kufijve”, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Ahmed Sulltan akuzohet se është organizator i një grupi kriminal, i cili nga viti 2020, ka kryer disa raste të dhënies ndihmë emigrantëve nga Lindja e Mesme, kundrejt 4500-5000 eurove/person, për kalim të kundërligjshëm në shtetet e BE-së, përmes rrugëve detare dhe atyre tokësore;
Gjithashtu, Interpol Tirana në bashkëpunim me homologët spanjollë kanë bërë të mundur kapjen dhe ekstradimin drejt vendit tonë nga Barcelona të shtetasit Gjergj Zefi, 31 vjeç, lindur në Sukth. Autoritetet raportojnë se GJKKO i ka caktuar 31-vjeçarit, masën e sigurisë “Arrest në burg”, për veprat penale “Prodhimi dhe shitja e narkotikëve’’, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Gjergj Zefi akuzohet se ka qenë pjesë e një grupi kriminal që mbante, transportonte, shiste dhe trafikonte lëndë narkotike.
Të ekstraduarit iu dorëzuan Drejtorisë së Përgjithshme të Burgjeve, për veprime procedurale të mëtejshme.
