Shorti i EURO 2024 ka vënë Shqipërinë përballë kundërshtarësh të vështirë në fazën finale të turneut të verës së ardhshme. me kuqezinjtë që do të përballen me Italinë, Spanjën dhe Kroacinë.
Dhe këtë shkallë vështirësie e sheh edhe trajneri i njohur, Shpëtim Duro, në analizën që i ka bërë shortit në “News 24”.
Duro ka treguar ndjesitë që ka pas këtij shorti, duke u ndalur pak te secila skuadër që do të ketë përballë Shqipëria, teksa insiston se vetëm një nga këto ekipe duhej shmangur me çdo kusht.
Përshtypjet mbi shortin – Para se të hidhej shorti, nuk doja 3 skuadra: Spanjën, Portugalinë dhe Francën. Janë ekipe që përballohen vështirë. Italia dhe Kroacia kanë patur oshilacione, është herët shumë, kemi edhe 6 muaj kohë. Është ajo kënaqësi e madhe që po përballemi me këta kundërshtarë.
Skuadra më e vështirë për Shqipërinë – Spanja. Kjo pasi Spanja është një nga skuadrat më të fortë në botë. Vështirësia për të përballuar këtë ekip është e madhe. Bilanci i Spanjës është jashtëzakonisht negativ për Shqipërinë. Ne e dijmë nivelin e tyre. Mënyra sesi luajnë ata, nuk na përshtatet aspak ne. Është një skuadër ndaj të cilës do hasim mjaft vështirësi.
Italia? Italia u shpall kampione Europe me meritë, por ka patur krizat e veta. Në këto moment nuk është mirë, të shohim pas 6 muajsh. Historia e Italisë është e madhe.
Rreziku që përfaqëson Kroacia për Shqipërinë- Nuk është e njëjta skuadër me disa vite më parë. Kroacia ne e dijmë shumë mirë që është fidanishte për talente. Është skuadër e rrezikshme. Gjithmonë në këto evenimente hyn me pretendime të mëdha. Ne kemi lidhje shumë me futbollin kroat. Mund të luajmë mirë edhe në këtë ndeshje. Spanja është e frikshme. Avantazhi jonë është se deri tani kemi bërë maksimumin dhe nuk kemi çfarë të humbim.
Shanset e Shqipërisë për të kaluar grupin – Futbolli nuk parashikohet. Në basketboll skuadra më e mirë fiton, por në futboll ka surpriza. Nuk mund të bëhen llogari. Është një grup jashtëzakonisht i vështirë. Kam besim se do lejmë shenjë të mirë.
