Një 60 vjeçar shqiptar është ekzekutuar me armë zjarri mbrëmjen e kësaj të enjte në Athinë.
Ngjarja ka ndodhur në lagjen Paleo Faliro rreth orës 21:00, ku shqiptari i identifikuar si Thimo Roland Droboniku alias Thimi Roland Prifti, është qëlluar në rrethana ende të paqarta me dy plumba, njëri prej të cilëve e ka prekur në kraharor.
Shqiptari është nisur drejt spitalit për ndihmë mjekësore, por nuk ka mundur të mbijetojë. Nga hetimet paraprake dyshohet se ngjarja ka lidhje me sekuestrimin e disa armëve rreth një javë më parë. Më 24 Nëntor, pranë kësaj zone, u gjet një makinë e braktisur ku brenda kishte kallashnikov dhe granatë dore.
Policia mundi të përfitonte gjurmën e gishtit të një personi, por mediat nuk japin detaje të tjera në lidhje me këtë ngjarje.
Sa i përket vrasjes së shqiptarit, mediat vendase shkruajnë se ky i fundit, kërkohej për përfshirje në grup kriminal, drogë, trafik të cigareve, mashtrim etj.
Autoritetet kanë nisur hetimet për zbardhjen e plotë të ngjarjes, si dhe identifikimin dhe kapjen e autorëve.
