Për shkak të motit të keq dhe mungesës së borëpastrueseve vijon të jetë tepër e rënduar situata në Qafë Murriz.
Mediat raportojnë se janë rreth 300 persona që kanë mbetur të bllokuar në automjetet e tyre për shkak se rruga është plotësisht e bllokuar nga dëbora ndërsa mungon ndihma e autoriteteve.
Prej më shumë se prej 5 orësh mes dëborës dhe të ftohtit kanë mbetur shoferë, fëmijë dhe gra të cilët janë bllokuar në automjetet e tyre në Qafë Murriz, ndërsa në krahun tjetër kjo dëshmon edhe një herë dështimin e institucioneve shtetërore në mirëmbajtjen e rrugëve kryesore.
Megjithëse acari dhe i ftohti polar ishte paralajmëruar prej disa ditësh nga meteorologet, edhe këtë herë autoritete lokale kanë qëndruar “duarkryq” duke mos bërë asgjë për të normalizuar situatën.
Nga Maqellara në Peshkopi, prej 5 orësh është e bllokuar, ndërsa edhe rrugët rurale janë të gjitha të bllokuara. Autoritetet e papërgatitura bëjnë me dije se është nisur një borëpastruese nga Tirana në drejtim të vendit ku janë bllokuar 300 persona. Por për shkak se rruga është bllokuar nga makinat e ndaluara, fadroma është kthyer sërish pas.
Situata e rënduar në Qafë Murriz:
- Moti i keq, akset më problematike nga veriu në jug
Ulja e temperaturave në vend ka sjellë edhe reshjet e borës në disa qarqe të vendit, kryesisht në zonën veriore.
Qarku i Kukësit është më problematiku nga reshjet e borës, ku trashësia ka shkuar deri në 20 cm në lartësinë mbi 700 metra. Edhe në qarkun e Elbasanit, në zonën e Librazhdit, bora ka mbuluar disa fshatra, si Stëbleva ku reshjet kanë qenë me instensitet gjatë natës.
Përveç reshjeve të dëborës, problemi më i madh është mungesa e borëpastrueseve dhe dështimi i institucioneve shtetërore në mirëmbajtjen dhe mbajtjen hapur të rrugëve kryesore.
Akset më problematike janë Dushaj – Lekbibaj, Qafa e Thorës, Vau i Dejës – Pukë – Kukës, Bajram Curri – Valbonë si dhe Librazhd – Peshkopi.
Temperaturat e ulta deri në -2 gradë Celsius mund të shkaktojnë ngrica duke e vështirësuar qarkullimin e automjeteve në këto akse për shkak të ngricave.
Situata e rënduar në Kukës, mungojnë borëpastrueset:
- Qarku i Korçës
Reshjet e dëborës prej pasdites së sotme po bien me intensitet të lartë jo vetëm në veri por edhe në juglindje të vendit tonë.
Mediat bëjnë me dije se dëbora ka mbuluar edhe aksin e rrugës kombëtare Përrenjas -Qafë Thanë. Si rezultat i mbizotërimit të motit të keq është vështirësuar jashtëzakonisht qarkullimi.
Në këtë aks rrugor prej ditës së Premte ka një qarkullim të dendur pasi me qindra familje nga kryeqyteti kanë zgjedhur të kalojnë fundjavën dhe Festat e 28-29 Nëntorit në Korçë.
Për shkak të fluksit të madh të automjeteve Policia Rrugore ka paralajmëruar që të gjithë përdoruesit e rrugë Qafë-Thanë-Pogradec-Korçë të qarkullojnë me automjete me goma dëbore dhe të jenë pajisur me zinxhirë.
Aktualisht rruga është e hapur, por me shtimin e intensitetit të reshjeve të dëborës situata mbetet e vështirë dhe e rrezikshme në qarkullim. Gjithashtu në disa fshatra të Korçës prej disa orësh vuajnë nga mungesa e energjisë elektrike.
- Akset e tjera problematike:
Akset në të cilat është bllokuar qarkullimi dhe ku po bëhet pastrimi i tyre janë Rruga e Arbrit, Cudhi Kamp-Qafshtamë, Bruzë Mal-Shkretë në qarkun e Tiranës.
Ndërkohë që më problematike shfaqet situata në zonën e Dibrës, ku rrugët e bllokuara janë Peshkopi-Maqellarë- Bulqizë: Bulqizë-Ura e Vashës-Qafë Murrizë; Peshkopi-Kuben-Kukës, si dhe aksi rrugor bypass-Qafë Murrizë.
Problematika dhe bllokime ka pasur dhe në akset ë Kukës-Bicaj-Bushtric dhe rruga Kukës Peshkopi, e cila lidh 5 njësi administrative.
Ndërkohë sa i përket furnizimit me energji elektrike, mbrëmjen e së premtes ka pasur avari në 13 fidera në qarkun e Fierit, kryesisht në zonat rurale, ku falë ndërhyrjes së ekipeve të OSSH-së është bërë i mundur riparimi i tyre. Në zonën e Vlorës, era e fortë ka bërë që të pezullohen lundrimet e trageteve.
- Situata në Fushë Krujë:
Shiu i dendur që ka rënë në 24 orët e fundit kanë bërë që niveli i ujit të lumit Gjole në Fushë Krujë të rritet ndjeshëm.
Aktualisht nuk raportohet për përmbytje apo problematika por nëse reshjet do të vijojnë lumi rrezikon të dalë nga shtrati dhe të përmbysë disa fshatra si Murqina, Mallkuci, Derveni, Likmete.
Lumi Gjole dhe ai i Zezës që kalon mes qytetit të Fushë Krujës bashkohen së bashku duke krijuar lumin e Ishmit i cili është shumë afër kuotave kritike dhe rrezikon fshatra të tërë në Komunën e Bubqit.
