Politologu Ilir Kalemaj tha në studion e MCN Live se edhe në sondazhet e opinionit publik ka dalë qartazi që qytetarët nuk e preferojnë kthimin mbrapa në kohë të opozitës në nivelin e parapolitikës, gjuhës së dhunshme dhe të akteve jonormale, megjithëse përsëriti se mazhoranca ka bllokuar të gjitha mekanizmat e një funksionaliteti normal të opozitës.
Duke vijuar më tej me logjikën, Kalemaj tha se opozita duhet të jetë kreative në rrugët, mekanizmat dhe format që ajo gjen pasi përmes akteve që ka ndërmarrë deri më tani ka promovuar personazhe me të cilat populli opozitar dhe pjesa gri është velur.
“A është kjo rruga e duhur për një opozitë që të hedhë tymtuese, ndoshta aksidentalisht ato të marrin dhe flakë aty, apo të kthejnë karriget përmbys, apo të intimidojnë deputetët e mazhorancës? Natyrisht që nuk është rruga ideale. Edhe në sondazhet e opinionit publik ka dalë qartazi që qytetarët nuk e preferojnë këtë kthimin mbrapa në kohë në nivelin e parapolitikës, gjuhës së dhunshme, të akteve jonormale të një funksionaliteti të një vendi që synon të jetë anëtar i BE-së. Janë bllokuar mekanizmat e një funksionaliteti normal të opozitës nga mazhoranca. Pavarësisht se mazhoranca e tall, e denigron e poshtëron këtë opozitë dhe i thotë që jeni të përçarë, jeni 3 PD, megjithëse deklaron se i ka mundur thellë, por prapë nuk kënaqet me kaq dhe i heq çdo lloj atributi funksionaliteti normal kësaj opozite.
Ballafaquar me këto kushte kjo opozitë nuk mund të operojë si në Danimarkë. Duhet të jetë kreative opozita në rrugët, mekanizmat dhe në format që ajo gjen, nuk është kreativitet që të kalosh në këto akte që favorizojnë jo elementët opozitarë që normalisht duheshin faktorizuar përmes komisioneve hetimore, përmes debatit, fakteve, kërkimit, por promovohen ata që janë të fortë, promovohen ata personazhe që është velur jo vetëm populli opozitar, por gjithë pjesa tjetër e popullatës, përfshirë pjesën gri që kërkon një alternativë ndryshe”, tha Kalemaj.
