Një 55 vjeçar është arrestuar në Fier, pasi akuzohet për trafikim automjetesh të vjedhura. Në pranga ka rënë shtetasi Edmond Zogo, i cili akuzohet se në bashkëpunim me 3 persona të tjerë grabisnin makina në Itali dhe Gjermani dhe i pajisnin me dokumente false në Fier.
3 bashkëpuntorët e tjerë, konkretisht shtetasit A. Dh., 38 vjeç, E. K., 43 vjeç, dhe A. M., 51 vjeç, janë shpallur në kërkim.
Ndërkohë janë sekuestruar dy automjetet e vjedhura të cilat sipas bluve kanë vlerën e 120 000 euro.
“Është vënë në pranga shtetasi E. Z., 55 vjeç, banues në Fier, si dhe janë shpallur në kërkim shtetasit A. Dh., 38 vjeç dhe E. K., 43 vjeç, të dy banues në Berat, si dhe shtetasi italian A. M., 51 vjeç.
Nga hetimet ka rezultuar se këta 4 shtetas, në bashkëpunim me njëri-tjetrin, kanë trafikuar në Shqipëri, automjete të vjedhura kryesisht në Itali dhe në Gjermani. Gjithashtu, se ndërhynin në elementet identifikuese të automjeteve dhe paraqitnin për to, dokumente false, me qëllim shitjen në vendin tonë.
Në cilësinë e provës materiale janë gjetur dhe sekuestruar 2 automjete tipe “Fiat” dhe “Iveco”, prodhime të viteve të fundit, me vlerë rreth 120 000 euro.
Vijon intensivisht puna për kapjen e 3 shtetasve të shpallur në kërkim, si dhe në bashkëpunim me Prokurorinë e Fierit, po kryhen hetime për të zbardhur dhe provuar ligjërisht raste të tjera të trafikimit të mjeteve, që mund të kenë kryer këta shtetas”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
