Nga Boldnews.al
Në datën 19 maj 2023, kryeministri Edi Rama bëri një status në rrjetet sociale, duke inauguruar “Nyjen e Fllakës”, në autostradën Tiranë-Durrës. Një nyje e cila ishte problematike. Për këtë segment u shpenzuan plot 1.2 milionë euro për të rehabilituar.
“MIRËMËNGJES , dhe me këtë pamje nga përfundimi i punimeve në Nyjen e Fllakës në Durrës, ju uroj një ditë të mbarë”, ishte statusi i kryeministrit në atë kohë. Pra, “pamje nga përfundimi i punimeve”.
Koha na ka treguar që mos t’i besojmë asnjë fjale të kryeministrit. Pasi, në kantieret e rrugëve që ai përuron, Autoriteti Rrugor Shqiptar akordon miliona lekë dhe euro si shtesë fondi.
Ka ndodhur disa herë në Rrugën e Arbrit, në Palasë, në Qafë-Botë apo edhe në Kardhiq-Delvinë. Pra, në pjesën më të madhe të rrugëve që ai dhe zëvendësja e tij, Belinda Balluku, përurojnë. Megjithatë, edhe për “Nyjen e Fllakës” ka sërish shtesë fondi, pavarësisht se Rama i përfundoi. Dy janë mundësitë; ose rruga s’ka përfunduar ose këto para’ po jepen në formë ryshfeti. Dhe këtë përgjigje duhet ta dijë si Rama ashtu edhe Balluku.
Megjithatë, kjo dyshe ka vijuar xhirot nga veriu në jug. Rasti më i fundit në Dibër, vizituan kantierin e segmentit Maqellarë – Peshkopi, ku automjetet e firmës “SELAMI” po bënin punime. Dhe, menjëherë sapo Rama-Balluku u larguan, Thesari i Shtetit i kaloi kësaj firme miliona euro, për skarpatet në rrugën e Arbrit.
Duket se vizitat e kryeministrit në këto kantiere janë vetëm për lëvrimin e fondeve, ndërsa të tjerët, duke nisur nga Balluku, janë të kënaqur. Por, paratë e Nyjes së Fllakës u vonuan disa muaj. Nga muaji maj, kur u bë statusi, deri në mes të nëntorit, ARRSH-ja kishte qëndruar në heshtje. Por, në një njoftim në APP, të siguruar nga BoldNews.al, Evis Berberi ka lajmëruar se ka hapur procedurën e prokurimit “rehabilitim dhe masa inxhinierike Nyja e Fllakës”.
Në fakt nuk është një tender, por një fond shtesë për këtë segment. Pra, paratë do t’i jepen firmës e cila fitoi tenderin e madh në vitin 2021. Në dokument shkruhet se fondi shtesë është 24.301.631 lekë, ose rreth 250 mijë euro.
Por, kush e fitoi tenderin e madh për rehabilitimin e kësaj nyje? Dokumenti i mësipërm është i ARRSH-së “njoftimi i fituesit”. Shkresa i është dërguar firmës fituese “AL-ASFALT”, me adresë në Xhafzotaj të Durrësit.
Bëhet fjalë për kontratën “rehabilitim dhe masa inxhinierike Nyja e Fllakës”, me një fond limit 124.503.327 lekë pa TVSH. Oferta më e ulët ka qenë ajo e BOE “S.M.O UNION” & “LIQENI VII” me vlerë 83.872.604 lekë. Ndërkohë, Autoriteti ka skualifikuar 6 firma që ofruan më pak për të shkuar te oferta e firmës fituese “AL-ASFALT”, që ofroi 121.508.153 lekë.
Oferta ishte shumë afër fondit limit dhe më e larta në tender. Pra, në atë kohë mori të gjithë fondit. Por nuk u mjaftua pasi drejtuesit zemërgjerë të ARRSH-së i dhanë edhe një shpërblim prej 250 mijë eurosh!
