Gjykata e Posaçme e Apelit ka shtyrë dhënien e vendimit për ish-kryeministrin Sali Berisha dhe dhëndrin e tij, Jamarbër Malltezi në lidhje me çështjen e privatizimit të ish-kompleksit Partizani, për shkak të materialit voluminoz. Seanca do të vazhdojë sërish ditën e nesërme, ku do të fillojë në orën 11:00.
Pas daljes nga gjykata, Genc Gjokutaj, avokati i ish-kryeministrit Sali Berisha ka deklaruar se në seancën e sotme kanë parashtruar të gjithë argumentat dhe pretendimet e tyre se masat ndaj liderit demokrat nuk qëndrojnë.
“Kemi që nga ora 9, në mënyrë shteruese kemi paraqitur të githa argumentat që masat shtrënguese nuk qëndrojnë, por edhe në thelb çështja është një farsë as juridike jo. Kemi parashtruar të gjitha pretendimet tona, shkeljet që janë bërë në shkallë të parë. Edhe Malltezi ishte prezent në gjykim. Shpjegoi elementet nga fillimi në fund të trajtimit të pronës. Gjykata nuk dha vendim, pasi konsideroi se materiali ishte voluminoz dhe seanca u shty për nesër.
Të gjitha kërkesat në shkallë të parë i kemi rikërkuar në Gjykatën e Apelit për t’i konstatuar dhe për ta rivendosur këtë proces në shinat ligjore. Z. Malltezi shpjegoi gjithë procedurën e privatizimit dhe përfitimit të pronës dhe gjithë atë normalitet që asaj procedure që është e habitshme se si mund të ngrihet në nivelin e një procesi penal. Procesi i njohjes dhe i kontestimit janë dy gjera krejt të ndryshme.”
I pyetur se pse nuk është paraqitur Berisha sot në gjykatë, Gjokutaj tha se nuk paraqitet karshi një vendimi antikushtetuese.
“Nuk e di pse nuk është paraqitur Berisha. Berisha nuk paraqitet karshi një vendimi antikushtetues. Është një vendim nominal i informuar nga ne mbi anti-kushtetuetshmërinë.”- tha Gjokutaj.
Kujtojmë se, Sali Berisha dhe Jamarbër Malltezi kanë ankimuar vendimin e GJKKO-së që la në fuqi masat e sigurisë ndaj tyre për çështjen “Partizani”. Sipas Berishës, GJKKO ka shkelur Kushtetun, duke qenë se nuk kërkoi autorizimin nga Kuvendi për vendosjen e masës së sigurisë “detyrim paraqitje” ndaj tij dhe “ndalim i daljes jashtë shtetit” duke i bllokuar pasaportën. Ndërsa Jamarbër Malltezi ndodhet në qeli nën masën “arrest me burg”.
Deri më sot, Berisha nuk është paraqitur asnjëherë në gjykatë, me pretendimin se nuk do refuzonte kurrë të shkonte, por jo në rastet kur shkelet Kushtetuta.
Berisha akuzohet nga SPAK për kryerjen e veprës penale “Korrupsioni pasiv i funksionarëve të larte shteterore ose te zgjedhurve vendore, kryer në bashkëpunim, parashikuar nga neni 260 e 25i Kodit Penal.
Ish-kryeministri i ka konsideruar akuzat ndaj tij dhe arrestimin e dhëndrit të tij Jamarbër Malltezi, si sulm politik, pasi sipas tij, nuk ka asnjë fakt dhe dokument që të ngrihen dyshimet mbi akuzat.
Sipas SPAK-ut, Berisha kryeministër ka vendosur në funksion të interesave të dhëndrit të tij bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”.
Ndërsa, për Jamarbër Malltezin dhe ndërtuesin Fatmir Bektashi, edhe ky i fundit nën masën “detyrim për paraqitje”, SPAK-u deklaron se ata kanë përfituar shuma të mëdha financiare nga tjetërsimi i truallit në ndërtime të larta.
Hetimi 3-vjeçar i SPAK-ut, i zbardhur në vendim 200 faqësh të Gjykatës së Posaçme, i ngjan një manekimi të parafabrikuar, për të cilin prokurorja ka përzgjedhur se cilat rroba i shkojnë më mirë.
Hetimi i ndërtuar nga SPAK-u për rastin “kompleksi Partizani” mund të përbëjë një rast tipik të përdorimit politik të prokurorisë kundër opozitës.
Ose, në të kundërt, nëse kjo është vërtetë qasja e këtij institucioni për të luftuar korrupsionin në nivele të larta, atëherë standarti hetimor i “Partizanit” do të duhet të vendosë pas hekurave thuajse të gjithë kryeministrat shqiptarë të kohës së pluralizimit, përfshirë edhe aktualin, Edi Rama, i akuzuar publikisht dhe gjerësisht për miratimin e “ligjeve me porosi”.
