Forcat izraelite po vazhdojnë operacionin në dhe përreth spitalit më të madh të Gazës, Al-Shifa ndërsa njoftojnë për katër qëllime kryesore, një prej të cilave është edhe zbulimi i qendrave komanduese të Hamasit që Izraeli beson se gjenden nën spital.
Ndërsa ky operacion vazhdon, nga spitali Al-Shifa sot (të dielën) janë evakuuar mbi 30 foshnje të sapolindura për në një spital fushor në Rafah të Egjiptit. Mbi 30 foshnje u evakuuan nga spitali kryesor i Gazës Al Shifa të dielën dhe u dërguan në Egjipt, njoftuan zyrtarët palestinezë të shëndetësisë.
Foshnjat e evakuuara janë dërguar në një spital të drejtuar nga Emiratet e Bashkuara Arabe në qytetin kufitar egjiptian, Rafah. Një zëdhënës i ushtrisë izraelite konfirmoi se atyre iu është kërkuar të krijojnë një korridor për të mundësuar evakuimet nga Al-Shifa.
Fati i të porsalindurve në Spitalin Al-Shifa kishte tërhequr vëmendjen globale pas publikimit të imazheve që tregonin mjekët që përpiqeshin t’i mbanin ata ngrohtë, pas një ndërprerjeje të energjisë elektrike që nxori jashtë funksionit inkubatorë dhe pajisje të tjera mjekësore. Ushqimi, uji dhe furnizimet mjekësore mbaruan ndërsa forcat izraelite luftuan me militantët palestinezë afër spitalit.
Izraeli ka thënë prej kohësh se grupi militant palestinez Hamas ka një qendër komandimi nën spitalin Al-Shifa. Trupat izraelite që janë vendosur në spital dhe kanë bastisur terrenin e tij për ditë të tëra thonë se kanë gjetur armë dhe pajisje të tjera ushtarake si dhe kanë ofruar pamje filmike të asaj që thonë se është hyrja e një tuneli.
