Policia ka evakuuar një familje të bllokuar në një automjet në Bypassin në Qafë Murriz, për shkak të reshjeve të dendura të dëborës, ku më shumë se 300 persona kanë mbetur të bllokuar.
Burra, gra, fëmijë dhe të moshuar kanë qëndruar për më shumë se 5 orë të bllokuar në Qafë Murriz, ndërsa policia në orët e mbrëmjes “zgjohet” për të shkuar në vendngjarje dhe për të nisur evakuimin fillimisht të fëmijëve.
Njoftimi i policisë:
“Policia Rrugore e Dibrës iu jep ndihmë dy fëmijëve dhe prindërve të tyre, që ishin bllokuar në automjet, dhe i transporton me makinën e një punonjësi policie.
Shërbimet e Policisë Rrugore të pozicionuar në bypass në Qafë Murrizë, gjatë kontakteve me drejtuesit e automjeteve që janë në pritje të hapjes së këtij aksi rrugor, pasi vijon ende të jetë i bllokuar si pasojë e motit të keq me reshje të dendura të dëborës, kanë marrë informacion se në një automjet ndodheshin të bllokuar dy fëmijë.
Ndërkohë, shërbimet e Policisë kanë marrë masa që me automjete të kalueshmërisë së lartë, të bëjnë evakuimin e pasagjerëve që ndodhen në automjete ne bypass Qafë Murrizë, për t’i nxjerrë nga zona ku kanë mbetur të bllokuar dhe për t’i transportuar në destinacion, në Klos, Bulqizë“, njofton Policia.
- Situata e rënduar në Qafë Murriz:
Për shkak të motit të keq dhe mungesës së borëpastrueseve vijon të jetë tepër e rënduar situata në Qafë Murriz.
Mediat raportojnë se janë rreth 300 persona që kanë mbetur të bllokuar në automjetet e tyre për shkak se rruga është plotësisht e bllokuar nga dëbora ndërsa mungon ndihma e autoriteteve.
Prej më shumë se prej 5 orësh mes dëborës dhe të ftohtit kanë mbetur shoferë, fëmijë dhe gra të cilët janë bllokuar në automjetet e tyre në Qafë Murriz, ndërsa në krahun tjetër kjo dëshmon edhe një herë dështimin e institucioneve shtetërore në mirëmbajtjen e rrugëve kryesore.
Megjithëse acari dhe i ftohti polar ishte paralajmëruar prej disa ditësh nga meteorologet, edhe këtë herë autoritete lokale kanë qëndruar “duarkryq” duke mos bërë asgjë për të normalizuar situatën.
Nga Maqellara në Peshkopi, prej 5 orësh është e bllokuar, ndërsa edhe rrugët rurale janë të gjitha të bllokuara. Autoritetet e papërgatitura bëjnë me dije se është nisur një borëpastruese nga Tirana në drejtim të vendit ku janë bllokuar 300 persona.
