Policia ka dalë me një njoftim zyrtar lidhur me ngjarjen që ndodhi një ditë më parë në Elbasan, ku një punonjës i OSHEE-së, humbi jetën.
Viktima i identifikuar si A. T., 61 vjeç, humbi jetën pasi ra në kontakt me rrymën elektrike, gjatë punës për riparimin e një defekti në një kabinë në fshatin Muçan.
Lidhur me rastin blutë bëjnë me dije se është arrestuar dispeçeri i OSHEE-së, shtetasi, A.N, pasi akuzohet për veprën penale “Shkelja e rregullave të mbrojtjes në punë”.
Ndërkohë është proceduar edhe shefi i ekipit të OSHEE-së pasi akuzohet për “Shpërdorim detyre”.
“Specialistët për Hetimin e Krimeve të Komisariatit të Policisë Elbasan, pas hetimeve të thelluara, të kryera në drejtimin e Prokurorisë së Elbasanit, për zbardhjen e këtij rasti:
-arrestuan shtetasin A. N., 58 vjeç, banues në Cërrik, me detyrë dispeçer i OSHEE-së, për veprën penale “Shkelja e rregullave të mbrojtjes në punë”, pasi dyshohet se nuk ka marrë masa për stakimin e energjisë elektrike në nënstacionin e zonës ku po punonte shtetasi A. T.;
-referuan materialet në Prokurori ku nisi procedimi në gjendje të lirë për shtetasin G. S., 31 vjeç, banues në Elbasan, me detyrë shef i ekipit të OSHEE-së, për veprën penale “Shpërdorimi i detyrës”, pasi dyshohet se nuk ka informuar për ndërhyrjen e shtetasit A. T., në kabinë, ndonëse vetë ka qenë informuar për këtë”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
