Për deputetin demokrat, Edi Paloka në politikë vendos vota, votohet dhe njerëzit zgjedhin atë që mendojnë se është më i vlefshmi dhe nuk do të thotë se je i vjetër dhe duhet të largohesh.
Duke folur për MCN Live, ai deklaroi se Sali Berisha është njeriu që i vetëm me të gjitha ato që iu bënë dhe në zgjedhjet e fundit ku u hoq vula dhe gjithçka, i vetëm mori mbi 500 mijë vota.
Lidhur me deklaratën e Agron Shehaj, për të qenë deputet i pavarur, ai tha se gjithsecili ka të drejtën të bëjë zgjedhjet e veta në një vend normal.
“Çdo largim jo i një deputeti, por dhe i një anëtari të thjeshtë në këto kushte kur opozita është nën presion, sigurisht që dëmton. Një opozitë me Ramën është shumë e vështirë, dikush i reziston dhe dikush jo”, tha.
Sa i takon deklarimit të Lulzim Bashës se do të depozitojë në Kuvend kërkesën për vetingun e politikaneve, ai tha se si njeri i ngjall neveri.
“Të shpërfytyrohet një qenie njerëzore në atë farë feje. Të kthehet në një shërbëtor të shpifur të Ramës, ndërkohë që kemi luftuar 8 vite për ta bërë Kryeministër. Ky është një shërbim i fundit ndaj Ramës. Unë ta bëj vetingun që jetoj me rrogë, apo ai që nuk di ku fsheh milionat dhe ndërtimet. Ne budallenjtë që luftonim që ta bënim Kryeministër. Kush e shfrytëzoi vetingun në drejtësi? U larguan gjithë prokurorët dhe gjyqtarët veriorë se u konsideruan si të opozitës dhe PD dhe i fshin gjithë veriorët. Sot keni hetues dhe prokurorë të diktaturës që sot drejtojnë strukturat kryesore të drejtësisë së reformuar se Basha vetë e quante akt mafioz. Ky tani na kërkon veting? Sikur të realizohet do të thotë që Edi Rama të vendosë për secilin nga ne se kush duhet dhe kush nuk duhet të jetë në politikë. Janë hequr prokurorë de gjyqtarë se nuk vërtetonin 1 milion lekë të vjetra, ndërkohë që Dvorani i Ramës, nuk justifikonte dot 100 mijë euro. Basha kërkon vetingun tim? Kam 30 vjet jetoj me rrogë dhe ç’më ka lënë im atë ky që u bë milioner duke qenë në opozitë, na kërkon vetingun ne. Kryesorja është ti shërbejë Ramës, të tregojë në çdo moment se sa i devotshëm është ti shërbej kryetarit të tij”, u shpreh Paloka.
