Tensione këtë të hënë te kryesia e Kuvendit, ku punonjësit e gardës bllokuan hyrjen në godinë të deputetëve demokratë.
Paraditen e sotme, deputetët e PD kishin parashikuar të zhvillonin një mbledhje grupi në ambjentet e kryesisë Kuvendit. I pari që mbërriti ishte kryedemokrati Sali Berisha, i cili pas një prononcimi për gazetarët, hyri në oborrin e instititucionit.
Pas kësaj, punonjësit e gardës mbyllën portat për të ndaluar hyrjen e disa ligjvënësve demokratë, ndaj të cilëve Komisioni i Etikës vendosi me votat e socialistëve përjashtimin me disa ditë nga punimet parlamentare. Megjithatë, me mbylljen e kangjellave të hrekurta, garda la jashtë dhe ligjëvënësit demokratë ndaj të cilëve nuk ka ndalim. Deputeti Flamur Noka gjeti si zgjidhje të kalojë kangjellat për tu futur në oborrin e kryesisë duke iu bashkuar Berishës.
Deputetë të tjerë u përplasjen verbalisht dhe fizikisht, duke u shtyrë me punonjësit e gardës të cilët bllokuan hyrjen.
Kjo situatë vijojë për disa minuta, derisa garda lejoi kalimin e deputetëve demokratë ndaj të cilëve s’ka masë ndaluese për të marrë pjesë në punimet e Kuvendit.
Berisha: Akt i pashembullt në historinë 32-vjeçare të pluralizmit. Bardhi: Ndalimi nuk përjashton mbledhjet e grupit
Teksa garada kishte bllokuar hyrjen për deputetët demokratë, kreu i PD Sali Berisha tha se ky është një akt i pashembullt në historinë 32-vjeçare të pluralizmit.
“Ky është parlamenti i Edi Ramës. Ky është parlamenti i Spiro Kolekës. Ky është parlamenti i një organizate kriminale të strukturuar. Shikoni çfarë ndodh, deputetët nuk lejohen të vijnë në zyrën e tyre. Ky është një akt i shëmtuar, ky është një akt i pashembullt në historinë 32-vjeçare të pluralizmit. Ky akt tregon tmerrin e Edi Ramës, tmerrin e organizatës së tij kriminale. Deputetët nuk mund të ndalohen në zyrat e tyre. Deputetët nuk mund të ndalohen të mblidhen në grupin e tyre. Kjo që bën Edi Rama, është akti më i shëmtuar, më i paprecedent. Të kërkon kohën kur dajo i tij kërkonte të fuste tanket dhe ushtrinë në protestën e studentëve. Kjo është fytyra më e turpshme e këtij institucioni, që në vend që të mbrojë interesat e qytetarëve, mbron interesat kriminale të Edi Ramës dhe bandës së tij. Ju nuk mund të bllokoni deputetët të shkojnë në zyrat e tyre. Ky Kuvend kaloi në klandestinitet”, tha Berisha.
“U bëj thirrje qytetarëve që të kuptojnë se cili është regjimi i Edi Ramës sot. U mbyll dyert deputetëve për të kaluar në zyrat e tyre, ndërsa deputetët e vet i kalon në klandestinitet në kundërshtim me ligjin dhe Kushtetutën. Nuk ka akt më të shëmtuar, kurrë nuk ka ndodhur, as në Bjellorusinë e Lukashenkos. Ky është parlamenti Rama-Linda! Deputetët e opozitës janë të vendosur të përmbushin detyrimet e tyre. Edi Rama i ka hyrë lepuri në bark, i është kallur data nga krimet dhe pasuritë e paligjshme”, shtoi ai.
Ndërkohë, Gazment Bardhi, pasi u lejuan kolegët demokratë pa masë ndalimi të futen në ambientet e brendshme të kryesisë së Kuvendit, mbajti një prononcim për gazetarët. Kreu i grupit parlamentar demokrat dënoi veprimet e gardës, duke u shprehur se masa e ndalimit dhënë nga “Etika” ndalon pjesëmarrjen në komisionet parlamentare dhe jo në mbledhjet e grupit.
“Deputetët e opozitës nuk lejohen të marrin pjesë në mbledhjen e grupit, sepse ky është vendimi i regjimit të Edi Ramës. Nuk lejohen të aksesojnë zyrat e tyre në kryesinë e Kuvendit, duke e trajtuar kryesinë e Kuvendit si vilën e Lindita Nikollës, e blerë me paratë e korrupsionit. Kryetarja aktuale e Kuvendit është i vetmi njeri, ministre arsimi, që është akuzuar nga kolegët e vet, që çonte badigardin për të marrë 3 mijë euro për një vend pune. Me lekët e korrupsionit bleu shtëpinë e saj, tani po e trajton edhe godinën e shtetit si shtëpinë e saj. Kolegët që lejohen do jenë aty për të treguar se ky është Kuvendi privat i Edi Ramës. Deputetët e opozitës kanë qenë dhe do jenë në betejë me këtë regjim. Kaq punonjës garde dhe punonjës të ruajtjes së sigurisë nuk u çohen bandave më të rrezikshme kriminale, i kanë vendosur përballë deputetëve të opozitës,” tha Bardhi i revoltuar.
Ai paralajmëroi kallëzim penal ndaj kryetares së parlamentit, Lindita Nikolla.
PS kalon online
Teksa opozita ka përshkallëzuar aksionin opozitar, PS ka vijuar me zhvillimin e mbledhjeve online. Komisioni për Ekonominë dhe Financat nisi në këtë formë, me prezencën virtuale të ligjvënësve socialistë. Një veprim që u aplikua edhe javën e kaluar, ndërsa opozita e cilëson jo ligjor.
PD, duke iu referuar rregullores së Kuvendit, është shprehur se mbledhjet online mund të kryhen vetëm “në rastet e masave të jashtëzakonshme që mund të vendosen për shkak të gjendjes së luftës, gjendjes së jashtëzakonshme ose gjendjes së fatkeqësive natyrore”.
Mbledhja e Komisionit të Ligjeve nisi me prani fizike të deputetëve, por u ndërpre. Vendimi i mor nga kryetarja e komisionit Klotilda Bushka pasi deputetë demokratë mësynë në sallën ku po mbahej mbledhja dhe debatuan me deputetët socialist, prezentë aty. Më vonë e njëjta skenë solli ndërprerjen e komisionit të Shëndetësisë dhe atij të Veprimtarisë Prodhuese. Komisioni i ligjeve u rimblodh online në 12:30. Online vijuan dhe mbledhjet në komisionet e tjera.
Deputetët demokratë janë angazhuar në bllokimin e punimeve të Kuvendit pasi shprehen se të drejtat e tyre po shtypen nga mazhoranca. Sipas opozitës, në mënyrë antikushtetuese, PS po pengon ngritjen e komisioneve hetimore të kërkuara nga PD si dhe po tenton të ‘përcaktojë’ opozitën duke refuzuar ndryshimet në komisionin e posaçëm të reformës zgjedhore.
