Media italiane “Corriere della Sera” ka zbardhur detaje të reja në lidhje me marrëveshjen e nënshkruar ditën e sotme mes kryeminstrit Edi Rama dhe homologes italiane Giorgia Meloni për strehimin në Shqipëri të refugjatëve nga vendet e Lindjes së Mesme që kapen në Itali
Raportohet se marrëveshja nuk do të zbatohet për emigrantët që mbërrijnë në brigjet dhe territorin italian, por ekskluzivisht për ata që shpëtohen në det, me përjashtim të të miturve, grave shtatzëna dhe subjekteve vulnerabël.
Kampet do të mund të strehojnë gjithsej deri në 3 mijë emigrantë, për një parashikim prej 39 mijë personash të mirëpritur në një vit, “për të përfunduar me shpejtësi procedurat për shqyrtimin e kërkesave për azil apo riatdhesimin e mundshëm”. Marrëveshja synon të pengojë largimet dhe të krijojë parandalim kundër trafikimit të qenieve njerëzore.
Sipas Melonit, në portin e Shëngjinit do të mbahen procedurat e zbarkimit dhe identifikimit, ndërsa në një tjetër zonë më të brendshme do të krijohet një strukturë tjetër e bazuar në modelin e Qendrave të Mbajtjes së Riatdhesimit (Cpr). Forcat e policisë shqiptare do të bashkëpunojnë për të garantuar “sigurinë dhe mbikëqyrjen e jashtme të strukturave”.
“Corriere della Sera” shkruan se protokolli u mbyll në thelb gushtin e kaluar (gjatë takimit që dy liderët zhvilluan dhe që u cilësua si një festë e thjeshtë) dhe do të jetë funksional në pranverën e vitit 2024.
Media italiane, duke iu referuar burimeve të Palazzo Chigi, shkruan se nuk parashikohet asnjë kompensim ekonomik në favor të Shqipërisë.
Ndërtimi i zonave në portin e Shëngjinit dhe Gjaderit do të jetë përgjegjësi e Italisë.
