Nga Boldnews.al
Shqiptarët që kapen në Britaninë e Madhe si emigrantë të paligjshëm, mund të përfundojnë në Ruanda, deri në deportimin e tyre në Shqipëri, ndërsa emigrantët afrikanë dhe të tjerë që vijnë nga vendet e luftës, të cilët kanë zbarkuar në Itali, do të strehohen në Shëngjin. Kjo është stregjia e Ramës, ku Shqiptarët i dërgon në Ruanda dhe kapanone të ushtrisë britanike, ndërsa pastron Italinë nga emigrantët me rrezikshmëri të lartë, duke i grupuar në Shëngjin. Nuk ka më diskutime, pasi u bë fakt i kryer me marrëveshjen e nënshkuar mes kryeministrit shqiptar Edi Rama dhe kryeministres Italiane Georgia Meloni.
“Ky fluks mund të arrijë deri në 36 mijë persona dhe kjo marrëveshje nuk përfshin të miturit, gratë shtatzëna dhe grupet vulnerable. Juridiksioni i këtyre qendrave do të jetë në Portin e Shëngjini, do të realizohet një qendër e pritjes dhe screening dhe do të ketë një strukturë tjetër, ndërsa pjesa shqiptare do të merret me kontrollimin dhe observimin. Marrëveshje të tjera do të ndjekin më pas. Në lidhje me këtë lloj bashkëpunimi. Kemi qëllim që të jetë operative pranverën e ardhshme”, tha Meloni.
Më qartë se kaq nuk ka, ndaj vendi do duhet të përgatitet për ditë më të zeza. Në Shqipëri do të mbërrijnë të rinj dhe burra, pasi fëmijët, gratë dhe të moshuarit do të trajtohen në qendrat italiane. Rreziku kryesor është se mes shumë emigrantëve mund të jenë persona me rrezikshmëri të lartë, një pjesë e të cilëve vijnë nga vende të luftës, duke e kthyer Shëngjinin në “vatër terrorizmi”. A ka kapacitete njerëzore dhe logjistike Shqipëria për të “zbuluar”, ndaluar dhe më pas ndjekur ligjërisht persona me rrezikshmëri të lartë? Faktet kanë treguar se të mbathurat e shtetit janë ulur poshtë gjunjëve si me hakerimin e të dhënave të shqiptarëve ashtu edhe depërtimin deri në rrëzë në strukturat policore, apo edhe vetë emailin e kreut të qeverisë.
Rama e ka mërrë këtë vendim pa u konsultuar me askënd. Tashmë është e qartë se në mesin e verës, kur kryeministrja italiane kaloi disa dinë në Vlorë, miku i gjatë i ofroi “truall të lirë” që vendin tonë që të kthehet në një “Big mejhane”, për të pritur emigrantët e paligjshëm. Po ashtu edhe ajo “puthje shkrarazi” që Rama i rrëmbeu Melonit sot ka një kosto jo të vogël: të paktën 36 mijë emigrantë do vendosen në Shëngjin…
Në dhjetë vitet e qeverisë Rama janë larguar nga vendi ynë mbi 700 mijë shqiptarë. Shumë prej tyre përfunduan në qendrat e azilit në Europë dhe njjë pjesë tjetër rrezikuan kokën duke udhëtuar me gomonet e ferrit nga Franca në Angli. Malinjiteti kryeministror arrin majat kur bën rolin e shpirtmadhit si i zoti i “shtëpisë” ku pasi ka dëbuar nga banesa fëmijën e tij, hap portën për të panjohurit, jo vetëm hallexhi, por edhe individë me rrezikshmëri të lartë ku mund të kamuflohen edhe terroristë.
Asgjë nuk qartësohet se çfarë do të bëhet me këta emigrant të paligjshëm dhe sa kohë do të qëndrojnë në Shqipëri. Gjithsesi vetë Rama ka lënë të kuptohet se do të integrohen në vendin tonë. Ai është mburrur se ka pritur afganë dhe u ofroi jo vetëm strehim por edhe punë.
Shqipëria është populli që historikisht ka njohur emigracion masiv, por situate aktuale nuk është vetëm për qëllime humanitare. Shumë prej emigrantëve vijnë nga vende të varfëra por edhe në konflikte të armatosura. Askush nuk mund të përjashtojë mundësinë që shumë terroristë, duke përdorur “kartën e emigrantit” të arrijë qëllime të tjera të cilat padyshim pasojën do e kalojnë qytetarët Shqiptarë dhe veçanërisht zona e Shëngjinit, e cila do të kthehet për tekat e Ramës jo më si “atraksion turistik” por si oaz rreziku.
